Æгъдаумæ гæсгæ йæ раттынц 3 номинацийы – литературæ, аивад æмæ наукæйы. Ацы хатт дæр премиты аккаг систы хуыздæртæ сæ бирæ азты фæллæйтты тыххæй.
Национ преми «Нарты фæткъуы» арæзт æрцыд 8 азы размæ. Лæвæрд цæуы, культурæмæ стыр æвæрæн чи бахаста, аивады æмæ наукæйы фæндæгтыл рæсугъд къахдзæфтæ кæнгæ чи цæуы, уыцы адæмæн. Се хсæн: Гæздæнты Булат, Джусойты Нафи, Хъамболты Тамерлан æмæ æндæртæ… Ацы аз дæр сбæрæг сты хуыздæртæ æмæ сæ кадджын уавæры схорзæхджын кодтой ирон академион театры. Ирон литературæмæ егъау æвæрæн чи бахаста, мадæлон æвзаджы аивдзинадыл чи кусы, кæстæртæн æй чи уарзын кæны, дæсгай чингуыты автор, публицист, зындгонд тæлмацгæнæг, журнал «Фидиуæджы» сæйраг редактор Хъодалаты Герсан – сси премийы лауреат. Радтой йын номылдаргæ чысыл скульптурæ æмæ хцайы преми.
Хъодалаты Герсан, Национ преми «Нарты фæткъуы»-йы номинаци «Литетарурæ»-йы лауреат: «Мæн стыр бузныг зæгъын фæнды ацы преми саразджытæн. Тынг хъæугæ хъуыддаг у. Стæй Хуссар æмæ Цæгат Ирыстоны хсæн интеграцион хъуыддæгтæн дæр стыр ахъаз у».
Номинаци «Аивад»-ы сызгъæрин фæткъуы ацы аз лæвæрд æрцыд Уæрæсейы кинематографистты цæдисы уæнг, Уæрæсейы аивæдты сгуыхт архайæг Туаты Тиминæйæн. Йæхæдæг куыд зæгъы, афтæмæй йæ царды сæйраг нысаныл нымайы райгуырæн зæххы историйы æмæ культурæйы сусæгдзинæдтæ базонын. Стыр иртасæн куыст кæны нæ рагфыдæлты, аланты, цардыуаг æмæ истори хуыздæр базоныныл. Ныридæгæн дæр цы документалон кинонывтæ систа, уыдон уарзон систы адæмæн. Стыр аргъ сын скодтой зындгонд ахуыргæндтæ дæр. Номинаци «Наукæ»-йы лауреат сси ЦИПУ-йы президент, Уæрæсейы наукæты сгуыхт архайæг, историон наукæты доктор, Мæхæмæтты Ахуырбег. Йæ чиныг «Разгром немцев под Владикавказом» рауагътой цалдæр хатты.
Мæхæмæтты Ахуырбег, ЦИПУ-йы президент: «Афтæ нæ зæгъын æмæ уый хуызæн чиныг нæй зæгъгæ. Бирæ йыл бакуыстон,бирæ æрмæджытæй пайда кодтон. Равдыстон æмæ дзы ныффыстон Ирыстоны минæвæрттæ хæсты рæстæг куыд хæцыдысты, уый. Æрмæст Кавказы нæ, фæлæ æндæр рæтты дæр». Преми «Нарты фæткъуы» уарзон у республикæйы цæрджытæн дæр. Ирыстоны хуыздæр минæвæрттæн лæвæрд кæй цæуы, уый дæр се ппæтæн æхсызгон у. Уæвгæ, номинанттæй алчидæр архайы Ирыстоны культурæ бахъахъхъæныныл, аивады æмæ наукæйы райрæзтыл.
Зыхъуаты Жаннæ
