Уый тыххæй дзы арæзт æрцыд концерт. Æвзонг музыканттæ сæ разамонæг, республикæйы адæмон артисткæ Дзебысаты Аллæимæ сценæйы равдыстой сæ курдиат.
Композици «Хъуыбады»-йæ райдыдта адæмон инструментты ансамбль «Дала-фæндыр»-ы концерт. Æдæппæтæй сфæлдыстадон къорды репертуары ис 15 цагъды. Иууылдæр сты ирон адæмон мелодитæ. Сæ фылдæрыл бакуыста ирон музыкалон аивады мэтр Гæздæнты Булат. Ансамблы разамонæг Дзебысаты Аллæимæ сты хæлæрттæ. Бирæ азты иумæ кусынц адæмон инструментты оркестры.
Дзебысаты Аллæ, ансамбль «Дала-фæндыр»-ы разамонæг, РЦИ-Аланийы адæмон артисткæ: «Тырнынц тынг. Никуы вæййы афтæ, цæмæй урокмæ ма `рбацæуой. Уый мæнæн дæтты ныфс, æвæццæгæн, сæ зæрдæмæ тынг цæуы».
Ансамбль «Дала-фæндыр» аивæдты лицейы бындурыл архайы 20 азы. Юбиляртæн раарфæ кæнынмæ æрбацыд бирæ адæм. Скодтой сын алыхуызон лæвæрттæ. Ужегаты Тамерлан сын балæвар кодта композици хъисын æмæ дала-фæндырæй, стæй уадындзæй. Юбиляртæ дæр хæсджынæй нæ баззадысты.
20 азмæ Дзебысаты Аллæ дала-фæндырæй цæгъдыны сусæгдзинæдтæ бирæ сывæллæттæн бацамыдта. Абон ансамблы ис 2 къорды. Архайы дзы 25 адæймагæй фылдæр. Уыдон сты лицейы адæмон хайады ахуырдзаутæ.
Гæздæнты Еленæ, ансамбль «Дала-фæндыр»-ы концертмейстер: «Ансамблы фæрцы мах уарзын кæнæм сывæллæттæн ирон адæмон музыкæ. Ныртæккæ ирон сфæлдыстадмæ фаг цæстдард нæй. Мах та нæ бон куыд у, афтæ архайæм, цæмæй сывæллæттæ ирон аивад уарзой, ууыл».
Сæлбиты Лианæ ансамблы архайы 5 азы. Куыд зæгъы, афтæмæй, дала-фæндырыл цæгъдын йæ къухы кæй бафтдзæн, уый æнхъæл никуы уыд.
Сæлбиты Лианæ, ансамбль «Дала-фæндыр»-ы архайæг: «Ацы инструментыл фыццаг рæстæг уыдис зын цæгъдын, уымæн æмæ ме `нгуылдзтæ рисгæ кодтой. Фæлæ йыл ныр сахуыр дæн, æмæ æнцон цæгъдын у ацы инструментыл».
Æвзонг музыкантты сфæлдыстад адæмы зæрдæмæ тынг фæцыдис. Сечъынаты Тайæ у Турчы цæрæг. Куыд зæгъы, афтæмæй райгондæй баззад, ацы концертмæ йын æрбацæуын кæй бантыст, уымæй.
Сечъынаты Тайæ: «Ирон диаспорæйы радзурдзынæн, цы рæсугъд сывæллæттæ ис Ирыстоны, цы дзæбæх зарынц, кафынц, фæндырæй цæгъдынц».
Дзугкойты Зинæидæ, Æрыдоны районы культурæйы управленийы специалист: «Уыцы ансамбль ныр тынг хорз кусы. Земæйæн цалынмæ йæ цæсть æрттива, уæдмæ уыцы ансамблæн бамынæг кæнын нæй».
Ансамбль «Дала-фæндыр» у республикон æмæ æппæтуæрæсеон конкурсты лауреат. Йæ сæйраг нысан у ирон музыкалон культурæйы хæзнатæ бахъахъхъæнын, æмæ зæгъæн ис, уыцы хæс сфæлдыстадон къорд æнтыстджынæй кæй æххæст кæны, уый.
Хъайтмазты Дзерассæ
