Ацы куыст Рахизфарсы районы администраци кæны 2008-æм азæй фæстæмæ. Ивынц хæтæлтæ, хæдзæртты сæртæ, подъездты рудзгуытæ æмæ дуæрттæ. Ныридæгæн уал ацы куыстытæ бакодтой 62 бирæфатерон хæдзары.
Беслæны, Дзарахохты Хадзымураты номыл уынджы 35-æм хæдзар 2013-æм азы æрцыд бындурон цалцæггонд. Ацы бирæфатерон хæдзарæн баивтой йæ сæр, сæвæрдтой иумæйаг нымайæн прибортæ, баивтой подъездты дуæрттæ æмæ рудзгуытæ дæр. Ногдзинæдтæм цæрджытæ рагæй æнхъæлмæ кастысты æмæ разы сты æппæт куыстытæй дæр. Марковы уынджы 1-æм хæдзар бындурон цалцæджы программæйы руаджы æрцыд нывылгонд. Цæрджытæ куыд зæгъынц, афтæмæй сæ хадзæр амад æрцыд 70-æм азты æмæ уæдæй нырмæ бындурон цалцæггонд нæ уыд. Ныр дзы хорзырдæм бирæ ивддзинæдтæ æрцыд.
Плиты Людмилæ, Марковы уынджы 1-æм хæдзары цæрæг: «Нæ хæдзары сæр уыдис тынг æвзæр уавæры. 5-æм уæладзыджы чи цæры, уыдонæн сæ къултæ хуылыдз кодтой. Абон уыйбæрц хорз скодтой уыцы кусджытæ, администрацийы æххуысæй кæй зæгъын æй хъæуы».
Ацы цалцæггæнæн куыстытæ Районы администраци кæны бындурон цалцæджы федералон программæйы руаджы, уыимæ ма цалцæггæнæн куыстытæн дихгонд цæуынц фæрæзтæ республикон æмæ бынæттон администрацийы бюджеттæй дæр.
Æгайты Георгий, Рахизфарсы районы администрацийы сæргълæууæг: «Федаралон программæ кусы 2008-æм азæй. Йе руаджы маз бындуронæй сцалцæг кодтам 62 хæдзары. Фæнды мæ зæгъын, æмæ ацы хъуыддаг адæм бамбæрстой сæхиуыл».
Рахизфарсы районы администрацийы куыд зæгъынц, афтæмæй бындурон цалцæджы руаджы бирæфатерон хæдзæрттæ бантыст сæвæрын кадастрон хыгъды.
Беслæны ис 220 брæфатерон хæдзары. Сæ фылдæр хай сын хъæуы бындуронæй цалцæг кæнын. Районы администрацийы специалисттæ куыд зæгъынц, афтæмæй ахæм куыст кæндзысты алы аз дæр.
Гугкаты Иринæ
