Рынчын æмæ йе нæниздзинад хъыгдард кæмæн у, уыцы сывæллæттæн баххуыс кæнын у паддзахады сæйрагдæр хæс. Куыд хуыздæр уавæртæ æмæ мадзæлттæ саразын хъæуы инвалид сывæллæттæн,
Алина Кантиева ахуыр кæны скъола – интернаты фæндзæм коррекцион къласы. Чызг тыхсы цæстыты низæй. Йæ уарзон предметтæ сты математикæ æмæ уырыссаг æвзаг. Фæлæ æппæтæй тынгдæр та Алинæ уарзы зарын. Æрæджы Мæскуыйы сси æппæтадæмон парамузыкалон фестивалы уæлахиздзау.
Алина Кантиева: «Архайдтон Мæскуыйы фестивалы. Репетицитæ кодтон оркестримæ æмæ зарæггæнджыты къордимæ. Уый фæстæ та сывæллæтты къордимæ. Кæронбæттæны сæ баиу кодтам, æмæ афтæмæй рацыдыстæм сценæмæ».
Музыкæйы ахуыргæнæг Иринæ Захарян куыд зæгъы, афтæмæй Алинæ зары фыццаг къласæй фæстæмæ. «Йе нæниздзинад хъыгдард кæмæн у, ахæм сывæллæттимæ куысын æнцон нæу»,- зæгъы Иринæ. Фæлæ сæм стыр фæндон кæй ис, æмæ сæ ахуыр кæнын кæй фæнды, уымæ гæсгæ сæ къухы æнтыстдзинæдтæ бафты.
Ирина Захарян, музыкæйы ахуыргæнæг: «Сывæллоны ахуыр кæнын куы фæнда æмæ йæхиуыл куы архайа, уæд йемæ кусын æнцон вæййы. Æнæниз сывæллæттæй сæ гæнæнтæ гыццыл хицæн кæнынц. Фæлæ нæ размæ уæддæр зындзинæдтæ никуы сæвзæры».
Коррекцион кълас съколайы фæзынд æхсæз азы размæ. Уæд дзы уыди æртæ скъоладзауы. Цæгат Ирыстоны ахуырад æмæ наукæйы министрады æмæ сывæллæтты фонд «ЮНИСЕФ»-ы иумæйаг программæ фыццаг фидаргонд æрцыди ацы ахуыргæнæндоны. Ныртæккæ сын дзы ис алы уавæртæ, бацæуæны сæвæрдтой пандус, бæстыхайы ис лифт дæр.
Абон ам ахуыр кæны 25 сахъат сывæллоны. Фыццаг уал семæ фæкусынц хицæнæй,стæй сæ раивынц иумæйаг къласмæ. Скъола – интернаты сабитæ сæхи æнкъарынц хорз. Æрмæст иумæйаг ахуырад нæ исынц, фæлæ мА дзы архайынц алыхуызон къордты дæр. Фæлæ сæм раст зæгъгæйæ ис къуылымпыдзинæдтæ дæр.
Фарстатæ гыццылгай лыггонд цæудзысты. Зæгъы республикæйы парламенты депутат Таболты Тамарæ. Закъондæттæг оргæнтæ æмгуыстад кæнынц ахуырады æмæ социалон рæзты министрадтимæ. Иумæ царды рауагътой инклюзивон ахуырады республикон программæ.
Ныртæккæ республикæйы цæуы инклюзивон ахуырады къуыри. Скъола – интернаты ахуырдзаутæ бацæттæ кодтой концерт. Дзырдтой æмдзæвгæтæ, аргъæуттæ, зарыдысты. Уазджытæ сæ цæсты сыг нæ уромынц, сывæллæттæ та æмбарынц, цыфæнды уæвæрты дæр иунæг кæй нæ уыдзысты, уый.
