«Гранд фешн ивэнт». Дзæуджыхъæуы арæзт æрцыд модæты республикон равдыст. Сæ коллекцитæ адæмы размæ рахастой зындгонд дуканитæ, аивдзинады салонтæ, æмæ хицæн дизайнертæ.
Цалдæр минуты фæстæ ацы чызджытæ рæсугъд къабаты рацæудзысты подиуммæ. Фыццаг хатт Дзæуджыхъæуы арæзт æрцыд модæты республикон равдыст «Гранд фешн ивэнт». Адæмы размæ сæ продукци рахастой уæлæдарæсы дуканитæ, бижутерийы æмæ аксессуарты фирмæтæ, аивдзинады салонтæ æмæ хицæн дизайнертæ. Се `ппæт дæр баст уыдысты «уалдзæджы æмæ сæрды» сезонимæ.
Равдысты архайдтой сывæллæттæ дæр. Дизайнертæ Бытъæты ВалерИ æмæ Перысаты Анастасия бацæттæ кодтой коллекци «Мæ фыды æмæ мады хуызæн». Æрыгон модельертæ куыд зæгъынц, уымæ гæсгæ йæ афтæ схуыдтой, алы сывæллоны дæр йæ ныййарджыты бафæзмынын кæй фæфæнды, уый тыххæй.
Равдыст саразыныл бацархайдта дизайнер, сывæллæтты модæйы театры директор Юлия Алексанова. Йæ ныхæстæм гæсгæ, уый йæ бæллиц уыд йæ чысылæй фæстæмæ.
Юлия Алексанова, сывæллæтты модæйы театры директор: «Фæндид мæ, цæмæй нæ горæты модæйы тендецитæм фæсивæд фылдæр `ргом здахой, йæ сæйраг принциптæ зоной, рæсугъд уæлæдарæс дарой. Уый у равдысты нысан. Куыд модæйы театры директор, афтæ та мæ фæндыд, цæмæй мæ хъомылгæнинæгтæ подиуммæ рацæуой, æмæ сæ курдиат равдисой».
Бур, сырх, æрвхуыз. Гом уæхсджытæ, комбинезонтæ, дарæсы алыхуызон формæтæ. Ахæмтæ сты «Уалдзæг-сæрд 2014»-ы сезоны трендтæ. Ирдæй сæ уыд фенын модæйы республикон равдысты.
Равдыст саразджытæ куыд зæгъынц, афтæмæй «Гранд фешн ивэнт» суыдзæн традицион мадзал республикæйы модæйы индустрийы. Уыдзæн афæдз 2 хатты. Гом кæндзæн сезонтæ «уалдзæг-сæрд» æмæ «фæззæг-зымæг.
Хъайтмазты Дзерассæ
