Кировы, Дыгуры, Æрæфы æмæ Рахизфарсы районты кусынц æрмæстдæр, иу ранæй иннæ ранмæ ласæн кæй ис, ахæм аппараттæ. Стационартæ та сæм уæвгæ дæр нæй. Уымæ гæсгæ се ппæтæн сæ бон нæу тарнизы ныхмæ цæстдарæн мадзæлттæ сæххæст кæнын. Дзæуджыхъæуы поликлиникæты флюорографтæ дæр сты хуыздæр хъуаг.
Кировы районы афæдзæй фылдæр нæ кусы флюорографион аппарат. Йæ аххосаг у программон ифтонгдзинад, бынæттон специалисттæн æй сæ бон снывыл кæнын нæу. Цæмæй адæмæн, уæддæр, гæнæн æмæ амалæй лæггад кæной, уый тыххæй, рынчынæн йæ риуæн скæнынц рентген.
Флюорограф 2006-æм азы райстой национ проект «Æнæниздзинад»-мæ гæсгæ. Йæ гаратий фæци 6 азы размæ. Æххуысагур курдиат арвыстой цы фирмæ йæ сарæзта, уымæ дæр. «Уым ты аппарат сцалцæг кæнынæн гыццыл аргъ нæ бацагуырдтой – 250 мин сомы», – зæгъы районы администрацийы сæргълæууæг Батиаты Хъазыбег.
Кировы районы афæдз дыууæ хатты фæкусы цæугæ флюорографион аппарат. Æрласынц æй тарнизы ныхмæ тохкæныны диспансерæй. Фæлæ уый адæмы æнæниздзинад профиклактикæйы хуызы æххæстæй сбæрæг кæнынæн фаг нæу. 2013-æм азы флюро скодтой 8 мин адæймагæн. Нысан та кодтой 18 минæн скæнын.
Афæдзы райдианæй нырмæ ацы районы рабæрæг кодтой 4 тарнизæй рынчыны. Сты æрыгæттæ. Дохтыртæ куыд зæгъынц, афтæмæй рынчынты нымæц рæзы афоныл низ сбæрæг кæнынæн хъæугæ медицинон æрмæг кæй нæй, уый. Кировы районы рынчындон иунæг нæу флюорографион æрмæг кæм нæй, ахæм. Сæрмагонд æрмæг нæй Æрæфы æмæ Дыгуры районты дæр. Нæй горæты иуæй – иу поликлиникæты дæр. Республикæйы сæйраг фтизиатор Малиты Батырбег куыд зæгъы, афтæмæй ацы хъуыддаджы къуылымпыдзинæдтæ æййафынц 2-æм, 4-æм, 6 поликлиникæты, стæй Рахизфарсы районы. Республикæйы флюорографтæ æлхæд æрцыдысты иу рæстæг, æмæ уымæ гæсгæ иу рæстæг сæ куыст хæлын райдыдта. Фæлæ се сцалцæг кæнын хауы муниципалон куыстуæттæм. Нырмæ ахæм аппараттæ кæмæ нæ уыди, уыдонæн та зæрдæ æвæрынц хæстæгдæр рæстæг балхæнынæй.
Фтизиатрты бæрæггæнæнтæм гæсгæ республикæйы тарнизы уавæр у карз. Цæгат Ирыстоны мин адæймагæй фылдæр рынчын сты активон формæйæ. Æрвылаз та ма фæрынчын вæййынц 300 адæймагмæ хæстæг. Уымæ гæсгæ, ахсджиаг у, хæцгæ низ йæ райдианыл диагностикæ скæнын, æмæ йæ афоныл дзæбæх кæнын райдайын.
