Дзæуджыхъæуы администрацийы специалисттæ, Галиуфарсы префектурæйы минæвæрттæ, дины æмæ æхсæнадон организациты кусджытæ сфæнд кодтой ацы фæзуат горæты бонмæ ныссыгъдæг кæнын.
Дзæуджыхъæуы фæлладуадзæн бынат терренкуры арæзт æрцыд радон зиу. Ацы хатт фæзуат ныссыгъдæг кæнынмæ рацыдысты горæты администрацийы æмæ Терчы галиуфарсы префектурæйы кусджытæ, республикæйы дины кусджытæ, студенттæ. Æдæппæтæй 500 адæймаджы.
Дудараты Мæхæмæт, Терчыфалейы районы разамонæджы хæстæ æххæстгæнæг: «Федтат, бирæ адæм рацыдысты. Тыххæй сæ ничи ракодта. Раджы заман ирон адæммæ уыд зиу, æмæ абон афтæ зæгъын, уый зиу у. Фæхабар кодтам æмæ æрбацыдысты студентæ, кусджытæ. Сæхи зæрдæйæ рацыдысты».
30 азæй фылдæр адæймаг кæм нæма уыд, уым канд бырæттæ ссыгъдæг кæнын нæ хъæуы, фæлæ ма хус, саст бæлæстæ раласын. Уый та æнæ сæрмагонд техникæйæ зын у. Ацы зиумæ Спецэкосервис æмæ æндæр сæрмагонд службæтæ радих кодтой 15 техникон иуæджы.
Бирæгъты Аслан, Дзæуджыхъæуы администрацийы цæрæн-коммуналон хæдзарады комитеты сæрдары хæдивæг: «Сæ фылдæр сты, горæт цы техникæ æфснайы, уыцы техникæ, зæгъæм 10 КАМазы «спецэкослжбæ» æмæ «спецэкосервис»-ы машинæтæ. 3 – уæззау бæлæстæ машинæмæ чи калы, ахæмтæ, стæй ма фæндаггон службæты æмæ арæзтадон техникæ ацы бон ам ис».
50 гектары фæзуаты æфснаинæгтæ бирæ ис, фæлæ горæты администраци йæ размæ сæвæрдта хæс куыстытæ горæты бонмæ фæуын.
Плиты Алыксандр,Дзæуджыхъæуы администрацийы информацион хайады сæргълæууæг: «Ам тынг бирæ куыст ис, уымæн æмæ 30 азы ацы фæзуат æфснайд нæ цыд, æмæ дзы тынг бирæ куыст ис ныр. Æмæ мах архайæм, цæмæй нæ сахары бонмæ куыд сыгъдæг кæнæм ацы бынат, ууыл. Æмæ мæм ис курдиат нæ сахары цæрджытæм, цæмæй иумæ бафснайæм ацы бынат, чысыл рæстæджы фæстæ дзы нæхæдæг куыд улæфæм, уый тыххæй».
Ацы зиу фыццаг нæу, фæлæ ма куыст бирæ, æмæ ма горæты администраци нысан кæны цæрджытæм радон хатт фæсидын, цæмæй ног фæлладуадзæн бынат «Нæртон» ног азмæ арæзт æрцæуа.
Моргуаты Ладæ
