филиал вгтрк государственная телерадиовещательная компания “Алания”

Сенатортимæ иумæ Ирыстонмæ ссыдысты Паддзахадон Думæйы депутаттæ. Кадджынæй сыл аэропорты сæмбæлдысты Хацъæты Олег, Тотоонты Алыксандр, Цæгат Ирыстоны Парламенты сæрдар Алексей Мачнев, хицауады сæрдары хæдивæг Челæхсаты Рустем æмæ æндæр бæрнон кусджытæ. Аэропортæй уазджытæ сæ фæндаг акодтой Беслæны мемориалон уæлмæрдмæ. Дидинджытæ æмæ веноктæ сæвæрдтой Хъыджы бæласы цур, стæй теракты чи бахауд, уыдон уæгъдгæнгæйæ цы æфсæддонтæ фæмард, уыдоны номыл цыртдзæвæнтыл.

Кусæг балцы рæстæг сенатортæ æмæ Паддзахадон Думæйы депутаттæ ныхас кæндзысты Цæгат Кавказы историон-культурон бынтæ бахъахъхъæныныл, фæнд кæнынц, Уæрæсейы культурæйы райрæзтæн ахъаз чи уыдзæн, цалдæр ахæм закъоны проектыл бакусын. Культурæйы сгуыхт архайджыты æмæ кусджыты хъæппæристæм æркæсгæйæ æмæ сæ хъуыды кæнгæйæ, ивддзинæдтæ хаст æрцæудзысты культурæйы тыххæй закъонмæ.

Бабæрæг кæндзысты республикæйы культурон артдзæстытæ æмæ ахуыргæнæндæттæ, фембæлдзысты национ-культурон æхсæнадтты минæвæрттимæ.

Экскурсийы сæ аласдзысты Куырттаты коммæ, уым фендзысты нæлгоймæгты Алайнаг моладзандон. Сæ балцы хатдзæгтыл æрныхас кæндзысты республикæйы сæргълæууæг Мамсыраты Таймуразимæ.

Делегацийы уæнгтæ куыд зæгъынц, афтæмæй Цæгат Ирыстонмæ хуымæтæджы не ссыдысты. Республикæйæн ис хъæздыг историон-культурон традицитæ æмæ æгъдæуттæ. Лæууы рæзты фæндагыл. Ис дзы бирæ цымыдисаг туристон проекттæ.

Делегаци республикæйы уыдзæн цалдæр боны.