филиал вгтрк государственная телерадиовещательная компания “Алания”

Цæгат Ирыстоны бæрæг кæнынц Ирон æвзаджы бон. Нысангонд æрцыд 2003-æм азы æмæ баст у, 115 азы размæ Хетæгкаты Къостайы «Ирон фæндыр» мыхуыры кæй рацыд, уыимæ. Ирон æвзаг æмæ литературæйы бон арæзт фæцæуынц алыхуызон мадзæлттæ. Сæ иу абон уыд прогимназ «Интеллект»-ы.

Уазæгуаты сæм æрбацыд республикæйы сæргълæууæг Мамсыраты Таймураз æмæ ахуырады æмæ наукæйы министр Огъуаты Алан. Ацы бонмæ сывæллæттæ бацæттæ кодтой бæрæгбоны программæ ирон кæфтытимæ æмæ адæмон спортивон хъæзтытимæ. Ахуырдзаутæ алы адæмыхæттыты национ уæлæдарæс скæнгæйæ, уазджытæм дзырдтой алы æвзæгтыл. Мамсыраты Таймураз æмæ Огъуаты Алан зæрдиагæй бакастысты Лацойты Давиды презентацимæ. Æвзонг лæппу ахуыр кæны 12-тæнон фæндырыл цæгъдын. Фæнды йæ дæсны цæгъдæг суæвын.

Сывæллæттæ уазджыты зæрдыл æрлæууын кодтой ирон æвзаджы бындурæвæрæг Хетæгкаты Къостайы цард æмæ сфæлдыстад. Стæй равдыстой концерт. 3-æм къласы ахуырдзаутæ та, нырыккон технологитæй пайда кæнгæйæ, скодтой гом урок.

Мамсыраты Таймураз, РЦИ-Аланийы сæргълæууæг: «Чи уæ ахуыр кæны, уыдонæн уæ сæртæй ныллæг кувут. Уыдонæн бузныг зæгъут. Мæнæ ацы гимназы сымах тыххæй йæ рæстæг чи сафы, уыдон сæ зæрдæтæ сымахæн уарынц хайгай. Æмæ сын сæ ном макуы ферох кæнут. Стæй ма уын зæгъын, цалынмæ гыццыл стут, уæдмæ йæ бауарзут. Йер æй куы нæ бауарзат, уæд уый фæстæ зындæр уыдзæн. Мæнæ адджынаг куыд уарзут æмæ дзы бафсæдын уæ бон куыд нæу, афтæ йæ бауарзут æмæ дзы бафсис куыд нæ зонат».