филиал вгтрк государственная телерадиовещательная компания “Алания”

Нымад у скæсæйнаг традицион медицинæйы хуызыл. Нæ республикæйы йын бындур æвæрд æрцыд Медицинон академийы нервыты низты кафедрæйы ассистент Цогойты Замирæйы хъæппæрисæй. Уæдæй нырмæ сæдæ дохтырæй фылдæр райстой ацы специализаци æмæ ныр æнтыстджынæй архайынц рынчынты дзæбæх кæныныл.

Хъайттаты Анжелæ ныр 6 мæйы дæргъы йæхи дзæбæх кæны рефлексотерапийы руаджы. Сылгоймагæн арæх фæриссы йæ сæр, хъыгдард у йæ нервыты системæ. Дохтыр-рефлексотерапевт, профессор Цогойты Алан ын ныридæгæн кæны 2-аг дзæбæхгæнæн курс. Анжелæ йæхæдæг куыд зæгъы, афтæмæй йæ æнæниздзинады уавæр бæлвырд фæхуыздæр.

Хъайттаты Анжелæ, Дзæуджыхъæуы 1-æм поликлиникæйы пациент: «Дыккаг курс куы райдыдтон кæнын, уæд фæхуыздæр дæр, ахæм рыстытæ дæр мын нал ис, раздæр мын цы рыстытыæ уыд, ахæмтæ. Æртыккаг курсы фæстæ та бынтон фæхуыздæр уыдзынæн æмæ мын ныфсытæ æвæры, уыдзæнис дзæбæх, зæгъгæ».

Рефлексотерапевтты æххуыс кæй хъæуы, ахæм адæмы нымæц чысыл нæу. Ацы методæй пайда кæнынц куыд хицæнæй, афтæ æндæр дзæбæхгæнæн процедурæтимæ иумæ дæр. Республикæйы специалисттæй хуыздæртæй иуыл нымад у профессор Цогойты Алан. Специализаци райста Санкт-Петербурджы, докторон диссертаци та бахъахъхъæдта Китайы. 1973-æм азы ацы куыстæн бындур сæвæрдта Аланы мад, зындгонд дохтыр Цогойты Замирæ. Уæдæй нырмæ медицинæйы ацы къабазы цæуынц хорзырдæм ивддзинæдтæ.

Медицинæйы ацы хуыз тынг пайда у дзæбæхгæнæн процессы. Рефлексотерапевт, санаторий «Осетия»-йы сæйраг дохтыр Цæллагкаты Людмилæ куыд зæгъы, афтæмæй Цогойты Замирæйы хъæппæрисæй Цæгат Ирыстоны байгом рефлексотерапийы фыццаг кабинет, фæстæдæр та дзы рауад службæ. 1980-æм азы та республикæйы фæзынд рефлексотерапевтты ассоциаци.

Цæллагкаты Людмилæ, санаторий «Осетия»-йы директор, уæлдæр къæпхæны дохтыр: «Замира Иосифовна Цогоева, на тот момент асиситент: «Цогойты Замирæ уыцы рæстæг уыд Цæгат Ирыстоны медицинон академийы нервыты низты кафедрæйы ассистент. Райста фыццаг специализаци Киевы, стæй уæд физиотерапевтон рынчындоны байгом кодта кабинет. Уыд бирæпрофилон æмæ дзы дзæбæх кодтой сывæллæтты, æмæ хистæрты дæр. Уыд тынг парахат, стæй ахадгæ».

Ныртæккæ республикæйы ис 200-мæ `ввахс рефлексотерапевты. Уыдон адæмæн лæггад кæнынц республикæйы районты æмæ Дзæуджыхъæуы рынчындæтты. Зæгъын хъæуы уый дæр, æмæ дзæбæхгæнæн методы гæнæнтæ æмæ авналæнтæ бонæй-бон уæрæхдæр кæнынц. Уый ты ууыл дзуры, æмæ 40 азы размæ бындур цы хъуыддагæн æвæрд æрцыд, уый пайда хæссы адæмæн.