филиал вгтрк государственная телерадиовещательная компания “Алания”

Куыд ма хъусын кодтам, афтæмæй Цæгат Ирыстонмæ ссыдысты Федерацийы Советы уæнгтæ. Дыккаг бон ныхас кæнынц культурæйы уавæрыл. Абон сенатортæ Арнольд Тулохонов, Сергей Щемлыгин æмæ Тайсауты Хъазыбег бабæрæг кодтой Цæгат Ирыстоны паддзахадон университет. Федтой рагон Аланийы музей. Профессор Бзарты Руслан уазджытæн сарæзта экскурси. Равдыста сын рагон дзаумæттæ, Хъобайнаг культурæйы æвдисæнтæ. Уый фæстæ кадджын уазджытæ федтой ног цалцæггонд спорты Галуан. Ам тренировкæтæ фæкæны нæ волейболон командæ «Иристон». Йæ рæстæджы йын тынг баххуыс кодта Тайсауты Хъазыбег. Фæстæдæр сенатортæ базонгæ сты аивæдты факультеты студентты куыстыты равдыстимæ, æмæ бабæрæг кодтой физикон-математикон факультеты нырыккон лабораторитæ. Университеты кафты ансамбль «Ирыстон» æмæ аивæдты факультеты студенттæ та уазджытæн равдыстой концерт. Иу номер сæвæрынмæ сын баххуыс кодта ирон театры артист Уалыты Гиви. Æмæ æрæджы систы фестиваль «Æвзист шпага»-йы уæлахиздзаутæ.