2 боны Дзæуджыхъæуы аивадон училищæйы ахуыргæнджытæ æмæ студенттæ уым кæндзысты дæсныйадæвдисæг ахуыртæ.
Виталий Яресько Цъæйы коммæ ссыдис Мæскуыйæ йæ бинонтимæ баулæфынмæ. Курдиатджын сывæллæтты сфæлдыстадон скъолайы дæсныйад æвдисæг ахуыртæм кæй бахаудзысты, уый æнхъæл нæ уыд. Йæ чызг Алесяимæ афæлвæрдтой æлыгæй дурын скæнын æмæ авгыл ныв кæнын.
Курдиатджын сывæллæтты сфæлдыстадон скъола байгом Дзæуджыхъæуы аивадон училищæйы хъæппæрисæй. Баххуыс сын кодтой Уæрæсейы æмæ республикæйы культурæйы министрадтæ. 2 боны ахуыргæнджытæ æмæ студенттæ, кæй бафæнда, уыдонæн амондзысты сæ дæсныйæдты сусæгдзинæдтæ.
Сфæлдыстадон скъолайы алчидæр ссардзæн зæрдæмæдзæугæ хъуыддаг. Чызджытæн цымыдисагдæр у æрмдæсныйы секци. Зæгъæм, ам сæ бон у цыбыр рæстæгмæ сахуыр кæнын алдынбыд кæнын.
Тæвд æфсæйнагæй алыхуызон дзуамæттæ кæнын амыдтой æрмдæсныты хайады студенттæ. Гойаты Владислав куыд зæгъы, афтæмæй ацы хъуыддаджы зынæй ницы ис. Сæйрагдæр у орнамент æрхъуыды кæнын.
Гойаты Владислав, Дзæуджыхъæуы аивадон училищæйы студент: «Куы йæ сныв кæнай, уæд æй пластинæй скæнын хъæуы, уый фæстæ та гипсæй йæ саразæм, уый фæстæ аллюминийæ, æмæ рауайы сувенир».
Сфæлдыстадон скъолайы сæйраг нысан у фæсивæды `ргом раздахын национ культурæмæ. Дæсныйад æвдисæг ахуырты бынатæн Цъæйы ком хуымæтæджы нæ равзæрстой. Форум саразджыты хъуыдымæ гæсгæ, æрмæстдæр хæхты ис æххæстæй банкъарын фыдæлты культурæ.
Дауыраты Зæлинæ, Дзæуджыхъæуы аивадон училищæйы ахуыргæнæг: «Ардæм æцæгæлон адæмæй чи æрбацыд, уыдон нæм тынг цымыдисæй кастысты, сæ зæрдæмæ тынг цыдис. Мах бафиппайдтам, иууылдæр иузæрдион сты ууыл, æмæ уыцы дæсныйæдтæн сафæн нæй. Арфæтæ кодтой. Уый уыдис тынг æхсызгон».
Сæрдыгон сценæйы – национ зарæн æмæ кафæн аивады фæлтæрдджындæр минæвæрттæ. Фольклорон-этнографион ансамбль «Хъуыбады» æмæ таурæгъгæнæг Хъыргъаты Габо скъолайы архайджытæн равдыстой сæ музыкалон арæхстдзинад.
Хъайтмазты Дзерассæ
