Музыкæйы рæсугъд бæрæгбон фæци стыр гала-концертæй. Аивадуарзджытæ бакастысты хуыздæр вокалон æмæ хореографион номертæм. Оперæ æмæ балеты национ театры сценæмæ
Бæрзонд аивады ахадындзинад адæймаджы зæрдæйы. Оперæ æмæ балеты Национ театры ивгъуыд къуырийы кæрон адæмæй, куыд фæзæгъынц, къух бакæнæн нæ уыди. Ахæм аивадон цау, хи цæстæй фенæн фæндыди алкæйы дæр. «Уазæгуаты Гергиты Ларисæмæ» 9-æм æппæтадæмон фестивалы гала-концерт, куыд алы хатт, афтæ ныр хъæздыг уыди дунейы зындгонд классикон уацмыстæй.
«Кремлы балеты», Мариинаг театры æмæ æндæр хъуыстгонд сфæлдыстадон къордты æмæ оркестрты минæвæрттæ цæгатирыстойнаг аивадуарзджытæн равдыстой сæ хуыздæр уацмыстæ. Классикон «Дон – Кихот», «Лебединое озеро» – театрдзаутæ стыр æхсызгонæй кастысты æмæ хъуыстой курдиатджын æмæ фæлтæрдджын артистты архайдмæ.
Гергиты Ларисæ, Уæрæсейы æмæ Украинæйы адæмон артисткæ: «Мæнмæ гæсгæ, ацы концерт фæрæстмæ. Афтæ мæм кæсы, æмæ аивадуарзджытæм уыди цымыдисдзинад. Уый бæрæг уыди концерттæм бирæ адæм кæй цыди, уымæй. Ацы хатт фестивалы программæ уыди тынг зын. Мæ зæрдæ хсайда, ома йæ адæм бынтон куы нæ бамбарой, зæгъгæ. Уыдис дзы бирæ инструменталон концерттæ. Фæлæ мæ дисы бафтыдта, адæм куыд цымыдисæй цыдысты, æмæ цы зын уацмыстæм хъуыстой, уый. Концертты фæстæ иу артисттимæ куы ныхас кодтон, уæд уыдон дæр дзырдтой, афтæ æнхъæл кæй нæ уыдысты, уый. Се ппæт уазджытæ дæр баззадысты тынг разыйæ».
Хорз ахуыргæнæг йæ хъомылгæнинагæй бæрæг у, хуымæтæджы нæ фæзæгъынц. Фестивалы уазджытæ уыдысты куыд аивады дæснытæ, афтæ сæ хъомылгæнинæгтæ дæр. Адæмы размæ рахастой рагон уацмыстæ нырыккон хуызы.
Гала-концерты кæронбæттæны та ирон аивадуарзджытæн артисттæ скодтой æхсызгон лæвар. Национ ирон музыкæйы зæлтæм балеты артисттæ акодтой импрвизацигонд «Ирон кафт».
Залы къухæмдзæгъдæн кæрон нæ уыд. Республикæйы хицауады сæрдар Такъоты Сергей та фестивалы цалдæр архайæгæн радта Цæгат Ирыстоны «Адæмон артисты» æвдисæндартæ.
Касаты Наирæ
