филиал вгтрк государственная телерадиовещательная компания “Алания”

Цæгат Ирыстоны паддзахадон университет иттæг хорз бæрæггæнæнтимæ каст чи фæцис, уыцы рауагъдонтæ абон райстой сырх дипломтæ. 

Уымæй уæлдай ма сæ схорзæхджын кодтой сæрмагонд майдантæй. Дипломтæ лæвæрдтой университеты президент Мæхæмæтты Ахуырбег, хицауады сæрдар Такъоты Сергей, сенатор Хацъæты Олег, горæты администрацийы сæргълæууæг Дзантиаты Сергей, вице-премьер Челæхсаты Рустем æмæ ректор Созанаты Валерий. Уыдон фæсивæдæн раарфæ кодтой, бафæдзæхстой сын, цæмæй ахуырады цы стыр бæрзæндтæм схызтысты, уымæй дæлдæр ма æрлæууой сæ дæсныйады дæр. Ацы аз университет каст фесты 800 студенты бæрц. Уыдонæй сырх дипломтæ райстой 150-йæ фылдæр. 

Гасанты Валерий, ЦИПУ-йы ирон филологийы факультеты магистратурæйы рауагъдон: «Мæ фыццаг диплом дæр уыдис сырх. Ныр дæр та райстон сырх диплом. Уый мын ахъаз уыдзæн дарддæр мадæлон æвзагыл кусыны хъуыддаджы. Фæнды мæ стыр бузныг зæгъын университеты разамындæн æмæ ахуыргæнджытæн».