филиал вгтрк государственная телерадиовещательная компания “Алания”

Низ сдзæбæх кæнынæй йæ не рудзын æнцондæр кæй у, уый зонгæйæ Цæгат Ирыстоны ветеринарон управленийы специалисттæ архайынц республикæйы фос низтæй бахъахъхъæныныл. Уæлдай тынгдæр та сæ цæст дарынц уымæ, цæмæй республикæмæ ящур – фадниз ма уа.

Фарон Кæсæг-Балхъары, Хъæрæсе-Черкессийы, Краснодары крайы фос кæй фæрынчын сты, уымæ гæсгæ цæгатирыстойнаг специалисттæ сты уæлдай къæрцхъусгæр. Фидаргонд æрцыдысты Цæгат Ирыстоны хицауады сæрмагонд уынаффæтæ дæр.

Афæдз дыууæ хатты: уалдзæджы æмæ фæззæджы, фосæн кæнынц вакцинаци. Лæппын фос дзы арæхдæр кæй рынчын кæнынц, уымæ гæсгæ сæм сæ цæст дарынц æдзухдæр. Фосæн вакцинаци скæнгæйæ сын сæ туг бæрæг кæнынмæ арвитынц Покровы цæрæгойты хъахъхъæныны институтмæ. Анализты хатдзæгтæм гæсгæ республикæйы дарддæр аразынц эпидемиты ныхмæ мадзæлттæ.

Республикæйы ветеринарон управленийы хъусынгæнинагмæ гæсгæ фарон дæр æмæ ацы аз дæр республикæйы фаднизæй рынчын фос нæ рабæрæг.

Фæззæгмæ бирæ рæстæг нал и, æмæ æппæт ведомствæтæ æмæ службæтæн дæр бабар кодтой сæ фос профилактикæмæ бацæттæ кæнын.

Специалисттæ сидынц, сæ хæдзæртты фос чи дары, уыдонмæ дæр, цæмæй сын афоныл скæной прививкæтæ. Ящурæй арæхдæр рынчын кæнынц стуртæ, фыстæ, сæгътæ. Адæмагыл дæр бахæцы – рынчын фосы дзидзайæ кæнæ æхсырæй куы фæхъæстæ вæййы, уæд.

Хадыхъаты Сослан, Горæтгæрон районы ветеринарон станцæйы сæйраг дохтыр: «Мæхæн нæ фыццаджыдæр хæс у профилактикон куыст кæнын. Фидарæй зæгъын – республикæйы ящур нæй. Ныртæккæ дæр кæнæм вакцинаци. Хъахъхъæнæм нæ фос».