Ныр цалдæр азы Пашковскийы æмæ Коцойы фырты уынгты тигъыл иумæйаг кæрты цæрджытæ зындзинæдтæ æййафынц, сæ цуры сын цы æнæзакъон арæзтад скодтой, уый тыххæй. Йæ
Гутнаты Людмилæ ахæм зындзинæдтæ æййафы ныр цалдæр азы. Сылгоймаг æвдисы, æнæзакъон арæзтад йæ хæдзары æмкъул кæй у, уый. Хъаст кæны, бæстыхай куы арæзтой, уæд ын бахъыгдæрдтой йæ хæдзары сæр. Фæстæдæр сыхаг арæзтады аххосæй Людмилæйы хæдзары къултæ афазтæ сты. Ацы азы 31 январы, Уæлдæр тæрхондон рахаста æнæзакъон арæзтад фехалыны уынаффæ. Фæлæ ма уыцы хъуыддагмæ æнхъæлмæ кæсын бахъуыди афæдзы æрдæг.
Гутнаты Людмилæ: «Афæдзы `рдæг ацы бæстыхай айсын сæ бон нæу. Цæрæм æнæцалцæг хæдзары. Нæ бартæ нын ничи ницæмæ дары. Иу закъон дæр йæ тыхы нæй. Курдиæттæ бахастам алы куыстуæттæм, фæлæ нын нæ хъуыддаг ничи ницæмæ дары, техникæ нын нæ дæттынц. Уæд нæ хъаст арвыстам Мæскуымæ. Ныффыстам прокуратурæмæ. Уырдыгæй нæм дзуапп ссыди, хъуыддаг кæй равзардзысты, уый тыххæй. Æмæ уæд иууылдæр базмæлыдысты. Нæхи республикæйы нæ фарста алыг кæнын нæ бон нæ уыди».
Калоты Рухсанæ, Галиуфарсы районы хистæр пъырыстыфы хæдивæг: «Пашковскийы æмæ Коцойы фырты уынгты тигъыл æнæзакъон арæзтады уынаффæ хаст раджы æрцыди. Бон дæр иу нысангонд æрцыди, фæлæ сæрмагонд техникæ кæй нæ уыди, уый тыххæй иу хъуыддаг ивд æрцыди. Ныр ис техникæ, æмæ специалисттæ райдыдтой арæзтад халын. Гутнаты Людмилæ ацы хъуыддæгтыл цы æхца бахардз кодта, уыдон ист æрцæудзысты æнæзакъон бæстыхайы хицау Дудараты Магомедæй».
Пенсиисæг куыд зæгъы, афтæмæй хæдзар у зæронд. Сцалцæг иу æй кодтой куыд сæ бон уыди, афтæ. Ныр та сæ бон нал у. хæдзары хъæуы бындурон цалцæг скæнын. Æрмæст адвокаттыл бахардз кодта 50 мин сомы.
Ацы хъуыддаг æрмæст Людмилæйы нæ хъыгдары. Иумæйаг кæрты цæры цалдæр бинонтæ. Æмæ сеппæты мæт дæр у ацы æнæзакъон арæзтад.
Арæзтад чи халы, уыдон зæгъынц, сыхæгты хæдзæрттæ кæй нæ бахъыгдардзысты, уый. Къултæ халынц дургай. Ацы хъуыддагмæ адæм бирæ æнхъæлмæ кастысты, æмæ ныр сæ зæрдæ дарынц, сæ хæдзæрттæ сцалцæг кæныны фадат сын кæй фæзындзæн, ууыл. Цы хæрдзтæ скодтой, уыдоны мæт дæр сæ нал ис.
