филиал вгтрк государственная телерадиовещательная компания “Алания”

Артур йæ машинæ балхæдта 6 мæйы размæ Хуссар Ирыстоны, уым асламдæр кæй уыд, уый тыххæй. Алы 3 мæйы дæр æй рæстæгмæ срегистраци кæны. Фæлæ ныр фæсарæйнаг паддзахадты номыртимæ машинæтæн тар æвгтимæ цæуыны бар нал ис, уый Артур нæ зыдта. Ахæм уынаффæ хаст æрцыд 2 мæйы размæ. Уæвгæ, уый иунæг ног домæн нæу. Раздæр паддзахадон автоинспекцийы кусджытæн ахæм шофыртæн сæ бон бæлвырд кæнын уыд æрмæстдæр регистрацион гæххæттытæ æмæ се вдисæндартæ. Ныр фæндаггон æгъдæуттæ фæкарздæр сты. 12-æм августæй фæстæмæ йæ тыхы бацыд ног закъон. Уымæ гæсгæ фæсарæйнаг паддзахадты номыртимæ машинæты шофыртæн хъуамæ æдзухдæр семæ уой, сæ транспортæн Уæрæсейы рæстæгмæ уæвыны бар кæй ис, таможняйы уыцы гæххæттытæ.

Инспектортæ куыд зæгъынц, афтæмæй домæнтæ фæкарздæр кодтой, фæсарæйнаг паддзахадты номыртимæ машинæты шофыртæ арæх фæндаггон æгъдæуттæ кæй хæлдтой, уый тыххæй. Афæдзы райдианæй фæстæмæ республикæйы ахæм шофырты аххосæй æрцыд 48 фæндаггон фыдбылызы. 9 адæймаджы дзы фæмард. Æдæппæтæй та уыцы рæстæгмæ шофыртыл арæзт æрцыд 3 мины æмæ 500 административон хъуыддаджы. Паддзахадон автоинспекцийы сæ зæрдæ дарынц, ног домæнты фæрцы уавæр кæй фæхуыздæр уыдзæн, ууыл.

Бекъойты Артур, фæндæгтыл æдасæй цæуыны паддзахадон инспекцийы хицауы хæстæ æххæстгæнæг: «Куыд кæсæм нæ горæты уынгты, фæсарæйнаг машинæтæ куы фæцæуынц, уæд сæм рæдыдтытæ арæх вæййы. Ног бардзырдмæ гæсгæ махæн уыдзæн бар сæ гæххæттытæм лæмбынæгдæр кæсынæн, цæмæй сæ æфхæрæм, уыцы уавæр нæм хаудзæн».

Ног фæндаггон æгъдæуттæ сæ тыхы куы бацыдысты, уый фæстæ фыццаг стыр рейд арæзт æрцыд Дзæуджыхъæуы. Машинæтæ бæлвырд кодтой фæндаггон пъæлицæйæгтæ æмæ таможняйы управленийы кусджытæ. Ахæм рейдтæ хæстæгдæр рæстæг уыдзæн республикæйы районты дæр.

Хъайтмазты Дзерассæ