28 августа 2014, 17:42
Республикæйы пысылмæтты управлени æмæ имамты советы уæнгты хъæппæрисæй абон Дзæуджыхъæуы уыд æмбырд
Боны фæткмæ рахастой æрмæстдæр иунæг фарста – цы мадзæлттæ саразын хъæуы, цæмæй Расул Гамзатовы чи амардта, уыдон тагъд рæстæджы бæрæггонд æрцæуой, уымæн.
Боны фæткмæ рахастой æрмæстдæр иунæг фарста – цы мадзæлттæ саразын хъæуы, цæмæй Расул Гамзатовы чи амардта, уыдон тагъд рæстæджы бæрæггонд æрцæуой, уымæн. Æмбырдмæ хуынд æрцыдысты Цæгат Ирыстоны Парламенты æмæ хицауады уæнгтæ, министрадты æмæ ведомствæты, тыхы структурæты, æхсæнадон организациты минæвæрттæ. Æмбырдмæ æрбацæуджыты хъуыдымæ гæсгæ, Дудараты Ибрагимы æмæ Расул Гамзатовы чи амардта, уыдон сæ размæ æвæрдтой хæс – загъдкъахæн митæ расайын, республикæйы сабыр цард фехалын. Уыдон парахат кæнынц мæнг хъусынгæнинæгтæ, зæгъгæ республикæйы пысылмæттæ сты радикалон æмæ сидынц ваххабизммæ.
«Мах кусæм æргом, никæмæй ницы æмбæхсæм. Алкæй бон дæр нæм у æрбацæуын æмæ базонгæ кæнын нæ архайдимæ. Цæмæй нæ аххосджын кæнынц, уыимæ разы не стæм» – загъта Гуæцæлты Хадзымурат.
Имамты Советы æмæ пысылмæтты управленийы минæвæрттæ курдиат арвыстой республикæйы Парламентмæ, Хицауадмæ æмæ æдасдзинады советмæ – цæмæй сæ æмбырдтæй иуы æркæсой сæ куыстмæ æмæ йын аргъ скæной.
Æмбырды архайджыты хъуыдымæ гæсгæ ма æнгомдæр кусын хъæуы дзыллон информацион фæрæзтимæ. Республикæйы пысылмæттæ бирæ хорз хъуыддæгтæ аразынц, æмгуыст кæнынц æхсæнадон, хæрзаудæн организацитимæ, фæсивæдимæ кæнынц ахуырадон æмæ хъомыладон куыст – фæлæ сæ кой ничи кæны. Уый сæ хъуыдымæ гæсгæ бынтон раст нæу.
Уымæй уæлдайкурæг сты барадхъахъхъæнæг оргæнтимæ æмæ тыхы структурæтимæ æномдæр кусын. Цæмæй сæ бон уа уголовон хъуыддæгтæ тагъддæр раиртасын æмæ аххосджынтæ сбæрæг кæнын.
Дауиаты Эльбрус: «Пысылмон адæймаг ныртæккæ тынг æгадыл нымайынц. Нæ фыдæлтæм ахæм ныхас уыди «æрдæг молло динхалæг, æцæг молло динхæссæг». Æмæ нын 2 уидаджы акъуырдтой. Æцæг моллотæ, æцæг дины рухс чи хаста, уыдон. Фæлæ Хуыцау хорз у. Рацæудзæн фæлтæртæ, азтæ æмæ та Ирыстоны стъалытæ ссуддзысты. Дыууæ номы цæргæйæ баззайдзысты – уыдон сты Дудараты Ибрагим æмæ Расул Гамзатов. Æнæмæнгæй уыдзæн уыцы рæстæг».
темæмæ гæсгæ