филиал вгтрк государственная телерадиовещательная компания “Алания”

Дзæуджыхъæуы администрацийы уынаффæмæ гæсгæ 7 æхсæнадон организацийы æрбынат кæндзысты ног цалцæггонд бæстыхайы Ирыстойнаг уынджы. Ацы хъуыддагимæ разы не сты инвалидты æппæтуæрæсеон æхсæнады цæгатирыстойнаг хайады минæвæрттæ. Сæ хъуыдымæ гæсгæ, уым инвалидтæн æмбæлгæ уавæртæ нæй.

Инвалидты республикон æхсæнадмæ Мæхъиты Людмилæ æрбацыд йæ чызджы ахуырады фарстайы фæдыл. Айнæйыл цæуы 20 азы. Рынчын у сывæллæтты церебралон параличæй. Бинонтæм бирæ лыггæнинаг фарстатæ ис. Уыдоны тыххæй æхсæнадмæ арæх æрбацæуынц. Цæргæ кæнынц Алагиры. Горæтмæ ссæуын сын зын ввæйы. Фæлæ уал азмæ сæхицæн снысан кодтой æнцонцæуæн маршрут.

Мæхъиты Людмилæ: «Ардæм цæуын махæн у æнцондæр, ардæм транспорт цæуы фылдæр. Æндæр ранмæ нын зын цæуæн уыдзæн. Иунæгæй сывæллон нæ цæуы. Æз йемæ фæцæуын æдзухдæр».

Инвалидты æппæтуæрæсеон æхсæнады цæгатирыстойнаг хайад кусы 26 азы. Революцийы уынджы йын цы бæстыхай ис, уым вæййынц районты хайæдты разамонджытæ. Æрвылбон ардæм сæ проблемæтимæ æрбацæуы 60 адæймаджы бæрц.

Абон инвалидты æхсæнады цæгатирыстойнаг хайадмæ хауы 4 бæстыхайы Дзæуджыхъæуы. Сæйрагдæр ис Революцийы уынджы. Мæйы размæ горæты администрацийы фехъусын кодтой, организацийæн ног бынат кæй цæттæ кæнынц Ирыстойнаг уынджы, уый. Зæронд бæстыхæйттæ горæты приватизацийы пъланмæ гæсгæ ауæй кæндзысты муниципалон бюджет фæфылдæр кæныны нысанимæ.

Ахæм уынаффæимæ æхсæнады разы не сты. Сæ хъуыдымæ гæсгæ инвалидты бартæ нымады нæ цæуынц. Ног бæстыхайы æмбæлгæ уавæртæ нæй, ис Промышленнон районы, сæйрагдæр проблемæ та у, бацæуын æм зын кæй у, уый. Ирыстойнаг уынджыуылты æхсæнадон транспорт нæ цæуы.

Бетрозты Ритæ, инвалидты æппæтуæрæсеон æхсæнады цæгатирыстойнаг хайады сæрдар: «Ис къæхты бын. Ис дзы таксопарк, автоколонна, кæм æрлæууа транспорт, ахæм бынат дзы нæй».

Горæты арæзтады управленийы хицауы хæдивæг Боранты Владимир куыд æмбарын кæны, уымæ гæсгæ хъуыддаг афтæ нæу. Бæстыхай цалцæггонд цæудзæн æппæт арæзтадон домæнтæ æххæстгæнгæйæ. Æмбæлгæ уавæртæ уыдзæн, йе `нæниздзинад хъыгдард кæмæн у, уыцы адæмæн. Инвалидтæ æрбынат кæндзысты фыццаг уæладзыджы.

Горæты администрацийы не `мбарынц æндæр хъуыддаг, ныртæккæ инвалидтæ цы зæронд бæстыхæйтты сты, уыдон сæ ног, райдзаст бынатыл баивын цæуыннæ фæнды. Уыимæ ма йæ фæзуатмæ гæсгæ дæр уыдзæн фылдæр – 343 квадратон метры.

Плиты Алыксандр, Дзæуджыхъæуы администрацийы информацион хайады хицау: «Ахæм хъуыддаг разынд, æмæ уыцы бæстыхæйтты ис коммерцион организацитæ. Уыдон инвалидтæм сæ хъус нæ дарынц. Закъонмæ гæсгæ уыдон хъуамæ уым ма уой. Мах кæронмæ не `мбарæм, администрацийы ныхмæ чи тох кæны: Бетрозты Ритæ инвалидты уавæрты тыххæй, æви Бетрозты Ритæ уыцы коммерцион организациты уавæрты тыххæй».

Бетрозты Ритæйы ныхæстæм гæсгæ, уый æнæзакъон митæ никуы кодта. Æхсæнады бæстыхæйтты та цы коммерцион организацитæ ис, уыдонимæ инвалидтæ æмгуыстад кæнынц.

Бетрозты Ритæ, инвалидты æппæтуæрæсеон æхсæнады цæгатирыстойнаг хайады сæрдар: «Нам оказывают безвозмездные услуги по сервису компьютеров, картриджи меняют, заправляют, занимаются нашими сайтами. Они члены общества, половина работающих – инвалиды. Любое наше движение – законное».

Арæзджытæ зæгъынц, ног бæстыхайы цалцæггæнæн куыстытæ сентябры кæрон кæй фæуыдзысты, уый. Уым æрбынат кæндзæн 7 организацийы. Горæты администрацийы зæрдæ бавæрдтой, уыцы рæстæгмæ лыггонд кæй æрцæудзæн транспорты фарста дæр. Фæнд кæнынц æхсæнадон транспорты цалдæр маршруты ауылты аивын.