Адæм æрбацыдысты уыцы æвирхъау террористон акты амæттæгты æрымысынмæ. 2004-æм азы цаутæ йæхиуыл чи банкъардта, уыдон экранæй дзырдтой сæ мысинæгтæ. Куыд зын сын уыдис уыцы æртæ боны быхсын æмæ сын куыд бантыст судзгæ зындонæй раирвæзын. 1-æм, 2-æм æмæ 3 сентябрь сау бонтæй баззайдзысты Беслæны историйы – уыцы иумæйаг хъуыды загътой се ппæт дæр
Дзарасаты Хъазыбег: «Æз алы аз дæр ардæм æрбацæуын, 1-3-æм сентябрьмæ ам вæййын. Мæ фырты æрхъуыды кæнын. Ам ме `мбæлттæ, чи ма баззад æгас, уыдоны фенын, фæлæ дзы бирæты амардтой. Ме `мкъласонты дæр мын амардтой. Иумæ цыдыстæм ацы скъоламæ, мæ фырты дæр уымæн æрбакодтон. Алы аз дæр ацы мысæн бонты æрбацæуæм ардæм, æрхъуыды сæ кæнын, æндæр гæнæн нæй. Уадз æмæ йæ нæ кæстæр фæлтæр дæр зоной. Макуы уал æрцæуæд ахæм зæххы цъарыл».
