филиал вгтрк государственная телерадиовещательная компания “Алания”

Лирикон комеди арф хъуыдыимæ. Киноныв «Тэли æмæ Толи»-йы сфæлдыстадон къорд фембæлд журналисттимæ. Радзырдтой, куыд кусынц, уый тыххæй, цавæр æнкъарæнтæ сæм гуырын кæны сфæлдыстадон процесс. Кинойы режиссер-æвæрæг Александр Амиров куыд загъта, афтæмæй ныридæгæн куысты æрдæг конд æрцыд. Æмæ цы фæндтæ сæвæрдтой сæ размæ, уыдон уал æххæстгонд цæуынц. Сæ сæйраг фæндон у кæрæдзийы фарсмæ хорз сыхæгтау чи цæры, уыцы хуымæтæг гуырдзиаг æмæ ирон адæмы цард равдисын. Кахи Кавсадзе, Дагун Омаев, Нанули Сараджишвили, Дзиуаты Анатолий, Фидараты Сослан. Зындгонд актертимæ иумæ, дыууæ хъæуы – гуырдзиаг Тэлийы æмæ ирон Толийы цард равдисыныл бацархайдтой æрыгон артисттæ дæр. Бирæтæн ацы кинонывы архайд у дебют. Комеди исы компани «Хорошо-продакшн» Уæрæсейы культурæйы министрады æмæ Цæгат Ирыстоны кинематографистты æххуысæй. Ацы киноныв адæм фендзысты иннæ аз, фæззæджы.

Фидараты Сослан, РЦИ-Аланийы æмæ Хуссар Ирыстоны сгуыхт артист: «Иу æвзаг йедтæмæ дзы нæй ам – уый у профессионалон æазаг. Уæлдай нæу, ирон уа, цæцæйнаг, гуырдзиаг. Площадкæйыл иууылдæр æмхуызон стæм. У фыццаджыдæр хуымæтæг кино, абон цы цæуы нæ заманы, уый нæ фæнды равдисын, адæм куыд цæрынц, уый».

Дзиуаты Анатолий, УФ-йы аивæдты сгуыхт архайæг: «Архайд цæуы ам – Ирыстоны. Хæхбæсты цæрынц ирон лæг Бадзи æмæ гуырдзиаг лæг Кахи. Мæнæн тынг æхсызгон у, æз Дагун Омаевы рагæй зонын, æз йемæ кинотæ дæр истон, стырдæр æхсызгондзинад та уый у, æмæ дзы Кахи Кавсадзе кæй ис, уый. Дагун Омаев ам бирæ куыста, фæлæ Кахи Кавсадзе ам фыццаг хатт ис, уый та у стыр диссаджы актер æмæ йæ хъуамæ Ирыстоны зоной».