филиал вгтрк государственная телерадиовещательная компания “Алания”

Цъæйы райдыдта проект «Æдас Кавказ». Цæудзæн æртæ боны. Программæмæ хаст сты зонадон æмæ практикон ахуыртæ, хæхбæсты фæндæгтыл цæуыны домæнтæ æмæ психологон тренингтæ. Абон та схиздзысты Туристы хохы цъупмæ.

Айнæг къæдзæхыл фыццаг къахдзæвтæ акæнын алкæддæр зын у. Фидаргæнæн æмæ æдасдзинады системæйы æппæт сусæгдзинæдтæ базонынæн та хъæуы рæстæг. «Фæлæ алцæуылдæр ис сахуыр кæнæн. Сæйрагдæр у – ма тæрсын» – зæгъынц блог-тур «Æдас Кавказы» архайджытæ. Ахæм цымыдисаг мадзалмæ ссыд бирæ адæм Цæгат Кавказы республикæтæй.

Блогер Рейна Алиева ссыд Грознайæ. Пъæлицæйы дæлбулкъон зындзинæдтыл ахуыр у, фæлæ йæм цымыдисаг кæны ирвæзынгæнджыты куыст дæр. Фæнды сæ дæсныйадимæ хæстæгдæр базонгæ кæнын. Куыд зæгъы, афтæмæй къæдзæхы сæрмæ схизгæйæ, дæ алыварас куы акæсай – уæд уыцы æнкъарæнтимæ æмæ рæсугъддзинадимæ ницы ис абарæн.

Блог-тур арæзт æрцыд Цъæйы комы. Ирыстоны, Цæцæны, Дагестаны минæвæрттæ кæд хæххон цæугæдæттыл ахуыр сты, уæддæр сæ сæрты бæндæныл ахизын алчи йæ ныфс нæ бахæсдзæн. Архайджытæн ирвæзынгæнджыты дæсныйады сусæгдзинæдтæ æмæ хи дарыны æгъдæуттæ амонынц фæлтæрдджын специалисттæ. Æмæ иу иннæйы фæдыл 15 блогеры хизынц хæхтæм æмæ цæугæдæтты сæрты.

«Ирвæзынгæнджыты куыст зонын уæлдай никуы уыдзæн» – зæгъынц инструктортæ æмæ блог-туры архайджытæ. Æмæ се ппæт дæр разæнгардæй ахуыр кæнынц æдасдзинады домæнтæ хæххон уавæрты, цæугæдæтты сæрты хизгæйæ, бахъуаджы сахат фыццаг медицинон æххуыс бакæнын. Уыимæ ирвæзынгæнæг хъуамæ уа дæсны психолог дæр.

Блог-тур цæудзæн 3 боны. Уыцы рæстæгмæ алчидæр хæстæгдæр базондзæн ирвæзынгæнджыты куыст. Сæхæдæг дæр фæфидардæр уыдзысты.

Зымæгмæ хæстæгдæр ма ахæм мадзал аразт æрцæудзæн Кæсæг-Балхъары æмæ Хъæрæсе-Черкесийы хæхты. Алы туры фæстæ дæр йæ архайджыты æрмæджытæ фенæн ис блогты. Афтæмæй ирвæзынгæнджыты куысты тыххæй æрмæджытæ интернеты хызæджы парахат кæндзысты дунейыл.