филиал вгтрк государственная телерадиовещательная компания “Алания”

Æнæзонгæ ранмæ цæуын, ног бынаты ног цард аразын кæддæриддæр зын у. Уæлдайдæр та йе нæниздзинад хъыгдард кæмæн у, ахæм адæймагæн.

Украинæйы Хурыскæсæн хайæ Ирыстонмæ æрлидзæг Светлана Тулинæ у инвалид. 7 азы размæ йын алыг кодтой йæ къах. Уæдæй фæстæмæ цæуы протезыл. Фæлæ йын асаст. Ирыстоны йын нæй зонгæтæ æмæ хæстæджытæ. Сылгоймаг йæ хъаст кæмæ бахастаид, уый нæ зыдта.

Фæлæ адæмы фарн бирæ у. Æрбахуыдтой йæ Дзæуджыхъæуы ортопедийы æмæ протезтæ кæнæн центрмæ. Ам ын цыбыр рæстæгмæ лæвар скодтой ног протез, æмæ йæ цинæн кæрон нæй. Тынг æхсызгон ын у, хорз цæстæй йæм кæй ракастысты, уый. Йæхæдæг куыд зæгъы, афтæмæй протезæн 80 мины ницыхуызы сæмбырд кодтаид. Иннæмæй та ног протез у тынг рæсугъд æмæ æнцондарæн. Буар нæ хъыгдары æмæ йæ нæ риссын кæны.

Светлана Тулинайæн ис 2 чызджы. Нырма скъоладзаутæ сты. Бинонты та хъæуы дарын. Æмæ сылгоймаг фæнд кæны куыст ссарын. «Ахæм протезимæ мын уый зын нæ уыдзæн» – зæгъы Светланæ.

Дохтыртæ йын зæрдæ æвæрынц, 2 азы йæ протез кæй нæ бахъыгдардзæн, уымæй. Се *ххуыс æй куы бахъæуа, уæд та йæ фарсмæ балæудзысты.