Уый кадæн цымыдисаг балц арæзт æрцыд Куырттаты коммæ. Рагондæр хъæутæ æмæ культурон цыртдзæвæнтæ фенынмæ ацыдысты скъоладзаутæ æмæ студенттæ. Балц арæзт æрцыд сывæллæтты æмæ фæсивæды туризмы æмæ экскурситы центры хъæппæрисæй.
Бæлвырдæй фæлтæрдджын экскурсиаразджытæ радзурынц сывæллæттæн алы архитектурон арæзтады тыххæй дæр. Рагондæр хъæутæ Лæц, Цымыти, Дзывгъис… Алы дуры тыххæй дæр радзурæн ис цымыдисаг цау. Культурон цыртдзæвæнтæй бирæтæ арæзт æрцыдысты астæуккаг æнусты. Зæгъæм, Дзывгъисы фидарыл цæуы мин азæй фылдæр. Ныртæккæ нымад у, ЮНЕСКОйы хæзнатæтæй иуыл, куыд архитектруон цыртдзæвæн, афтæ. Ам историон бынæттæ канд фенæн нæй, фæлæ ма сæ мидæгæй фенын дæр. Уый стыр лæварыл нымайынц, Ирыстоны фыццаг хатт чи ис, уыдонæн. Се хсæн Джабраил Рабаданов дæр. У Елхоты аграрон техникумы ахуыргæнинаг. Йæхæдæг куыд зæгъы, афтæмæй сыхаг республикæйы истори зонын хорз у.
Ацы туристон балц скъоладзаутæн æмæ студенттæн скодтой сывæллæтты æмæ фæсивæды туризмы æмæ экскурситы центры кусджытæ. Баххуыс сын кодта сывæллæтты спортивон скъола «Æвзонгдзинад» дæр. Уæвгæ та ацы мадзал арæзт æрцыд туризмы æппæтдунеон боны кадæн.
Сывæллæтты æмæ фæсивæды туризмы центр ахæм мадзæлттæ аразы ныр фæндзай азæй фылдæр. Æмæ куыд зæгъынц, афтæмæй амæй хуыздæр фадат нæй, нæ историйыл андзæвынæн æмæ йæ хуыздæр базонынæн.
