Уым ныртæккæ цæуынц рæвдауæндон цалцæггæнæн куыстытæ. Райдыдтой къуыри размæ, фæлæ сын уыцы мгъуыдмæ бирæ бантыст. Ныридæгæн цы куыст бакодтой, уый фæрцы районы рæвдауæндæтты фæзындзæн 140 уæлæмхасæн бынаты. Ныртæккæ ма цалцæггæнæн куыстытæ цæуынц Сырх-Дыгуры рæвдауæндон «Ласточка»-йы æмæ Æхсæрысæры рæвдауæндоны. Толдзгуыны скъолайы бындурыл дæр сабитæн байгом кæндзысты цыппор уæлæмхасæн бынаты.
Цыколайы сывæллæтты рæвдауæндон «Аргъау»-ы йæ тæмæны бацыдысты цалцæггæнæн куыстытæ. Райдыдтой къуырийы размæ, фæлæ сын уыцы мгъуыдмæ бирæ бантыст. Баивтой электрон тыхдæттæг телтæ, рудзгуытæ, дуæрттæ æмæ бæстыхайы сæр. Нысан ма кæнынц пъолтæ, канализаци æмæ сантехникæ баивын дæр.
Скъолайы агъоммæйы ахуыргæнæндæтты уæлæмхасæн бынæттæ скæнын, æмæ сæм рад фæкъаддæр кæнын. Уый у ныртæккæйы сæйрагдæр хæстæй иу. Æрæфы районы администрацийы куыд зæгъынц, афтæмæй, ууыл хъуыды кæнгæйæ, скодтой сметæ, бауыстой иннæ ахсджиаг фарстатыл дæр.
Ныридæгæн цы куыст бакодтой, уый фæрцы районы рæвдауæндæтты фæзындзæн 140 уæлæмхасæн бынаты. Æмæ уый федералон фæрæзты руаджы. Рæвдауæндæттæ фæуæрæхдæр кæнынæн радих кодтой 20 милуан сомы. Муниципалон бюджетæй ма сæм бафтыдтой иу милуан æмæ дыууæ сæдæ мин сомы. Рæвдауæндон «Аргъау» – Æрæфы районы у æппæтæй стырдæр. Цалцæггæнæн куыстытæ дзы цалынмæ нæ райдыдтой, уæдмæ йæм цыди сæдæ æвдай æхсæз сывæллоны, кæдæ æмæ дзы сæдæ дæс бынаты йеддæмæ нæ уыд, уæддæр. Реконструкцийы фæстæ ма дзы фæзындзæн цыппор уæлæмхасæн бынаты. Ныртæккæ ма цалцæггæнæн куыстытæ цæуынц Сырх-Дыгуры рæвдауæндон «Ласточка»-йы æмæ Æхсæрысæры рæвдауæндоны. Толдзгуыны скъолайы бындурыл дæр сабитæн байгом кæндзысты цыппор уæлæмхасæн бынаты.
140 бынаты – уый стыр æнтыстдзинад у, зæгъынц районы администрацийы. Байгом ма кæндзысты инвалид –сывæллæттæн къорд дæр. Уымæй дарддæр бæстыхаймæ бацæуæны скæндзысты пандус æмæ æндæр сæрмагонд фæрæзтæ. Программæ «Доступная среда»-мæ гæсгæ кусдзæн инклюзивон ахуырад. Цыколайы рæвдауæндон цалцæггæнæн куыстыты архайы фæндзай адæймаджы. Æмæ йæ байгом кæндзысты ноябры.
Фидараты Маринæ
