филиал вгтрк государственная телерадиовещательная компания “Алания”

Импортон продуктты бæсты цæгатирыстойнаг продукци. Нæ републикæйы хъæууонхæдзарадон куыстуæттæ цæттæ сты уæрæсеаг базарадмæ бынæттон хæрзхъæд æхсыр, дзидза æмæ кæсаг дæттынмæ.

Рауагъдад фылдæр кæнынæн дæр ис алы уавæртæ. Фæлæ æнæ хъалонты льготæтæй æмæ æнæ паддзахадон æххуысæй хъуыддаг нæ сырæздзæн. Ахæм хъуыдыйыл хæст сты республикæйы æхсæнадон палатæйы уæнгтæ дæр, стыр хъалонтæ бизнесы рæзт къуылымпы кæнынц.

Цæгатирыстойнаг æрыгон куыстуæттæй иу Алания фиш, балер кæсагæй ифтонг кæны Уæрæсейы 3 регионы. Уæвгæ, сæ бон фылдæр регионтæм дæр уаид æрвитын, зæгъы куыстуаты директор, хъыгдарынц сæ стыр хъалонтæ. Паддзахадæн зын уавæрты рæстæг дæр хъалонтæ вæййы фæкъаддæр кæнын. Уый æрмæст бизнесменты хъуыды нæу. Æхсæнадон палатæйы куыд æмбарын кæнынц, афтæмæй стыр хъалонтæ æрмæст амалхъом адæмы нæ къуылымпы кæнынц, фæлæ экономикæ æмтгæй райсгæйæ.

Æхсæнадон палатæйы комитеты сæрдар, экономикон наукæты профессор Тускъаты Таймураз цæттæ у цæстуынгæйæ равдисын, ныллæг хъалонтæ абоны экономикон уавæртæн стыр пайда кæй æрхæсдзысты, уый.

Республикæйы хицауады куыд зæгъынц, афтæмæй хъалонты бæрц бæрæг кæнынц федералон ведомствæтæ. Регионты сын сæ бæрц аивæн нæй. Фæлæ дзы ис гæнæнтæ, райдиан æмæ фæлтæрдджын амалхъом адæмæн баххуыс кæнынæн. Цæгат Ирыстоны сæргълæууæг Мамсыраты Таймураз, хъæууон хæдзарады кусджытимæ фембæлды куыд фæбæрæг кодта, афтæмæй «Алания фиш», «Мастер-прайм Березка» æмæ «Де-Густо»-йæн сæ бон у уæрæсеаг базарадмæ рацæуын, æмæ импортон продукци раивын. Бизнесментæ дæр цæттæ сты сæ авналæнтæ фæуæрæхдæр кæнынмæ, фæлæ та ам дæр – æнæ паддзахадон æххуысæй, æмæ æнæ хъалонты льготæтæй зын зæгъæн у, куыд рауайдзæн, уый.