филиал вгтрк государственная телерадиовещательная компания “Алания”

Царды рухсмæ тырнындзинад æвдисы не мкусæг Хъæрджынты Иринæ йæ ног киноныв «Тъуннелы». Йæ презентаци уыд кинотеатр «Терчы». Æрыгон режиссер æмæ сценарийы автор йæ хæсыл банымадта нырыккон цард равдисыныл.

Премьерæйы бон залы къухбакæнæн нæ уыди. Бирæтæн дзы бынæттæ дæр не сфаг. Иууылдæр цымыдисæй æнхъæлмæ кастысты рагагъоммæ йæ кой кæмæн айхъуыст, уыцы цыбыр киноныв «Туннель»-ы райдианмæ. Фыццаг кадртæй дæр адæмы зæрдæты сæвзæрын кодта стыр æнкъарæнтæ. Сценаристтæ куыд зæгъынц, афтæмæй киноныв куы истой, уæд сын æххуыс кодтой бынæттон цæрджытæ. Цаутæ цыдысты Садоны.

«Коротко и ясно». Афтæ хуынди Андрей Тарковскийы номыл арæзт фестивалы программæтæй иу. Архайдта дзы ацы кинонывы режиссер Хъæрджынты Иринæ дæр. Кинофестиваль цыди Ивановæйы, æмæ дзы Иринæ равдыста йæ цыбыр киноныв «Туннель». Ныр кино куы срæвдз ис, уæд мæм дзы разынди цавæрдæр хъæндзинæдтæ, зæгъы Хъæрджынты Иринæ.

Сценарийы ныв у цардæй ист. Æртæ хойы царды истори, заууатмæ чи æрцыди, уыцы шахтерты поселочы. Дунейы цардæй баззадысты иуварс. Чызджыты мады фæлгонц сарæзта зындгонд артисткæ Гæбуты Жаннæ. Йæ цоты хъомыл кæны иунæгæй. Кусгæ та кæны продуктты дуканийы. Кинойы нырыккон ирд фæзилæнтæ нæй. Режиссеры фæндыд, хуымæтæг, хæххон царды зын фадæттæ равдисын.

Киноныв цæуы æрмæстдæр 30 минуты. Фæлæ уыцы цыбыр æмгъуыдмæ киномæкæсджытæ иууыдрæд арф банкъардтой сюжеты хъуыды. Адæмы къухæмдзæгъдæн кæрон нæ уыди. Уый фæстæ дзырдтой сæ хъуыдытæ. Бирæ бузныджы ныхæстæ загъд æрцыди режиссерæн. Ахæм хуымæтæг фæлæ егъау куыст скæнын йæ къухы кæй бафтыди, уый тыххæй.

Сюжет арæзт у мадæлон æвзагыл. Кусын ыл куы райдыдтой, уæд дзы иронау уыдысты, æрмæст хицæн диологтæ. Фæлæ фæстæдæр режиссер йæ хъуыды аивта, æмæ йæ иууылдæр скодтой ирон æвзагыл.

Кинойы бирæ актертæ нæ архайынц. Фæлæ куысты рæстæг систы иу бинонтау. Сæйрагдæр та – профессионалон командæ.