14 милуан сомы. Уыйбæрц дарынц хæс сæ 8 мæйы куысты мыздæй Алагиры фæндæгтæ цалцæггæнæн-арæзтадон управленийы кусджытæй. Организацийы фæллой кæны 190 адæймаджы.
Алагиры фæндæгтæ цалцæггæнæн-арæзтадон управленийы фæллойгæндæжытæ нæ кусынц ныр афæдзы райдианæй. Уымæн æмæ сын сæ мызд нæ фидынц. Хæс та сæ дарынц 14 милуан сомы. Куыстуаты фæллой кæны 190 адæймаджы. Æмæ се ппæт дæр рацыдысты митингмæ. Домынц, цæмæй сын сæ мыздæй цы хæстæ дарынц, уыдон бафидой. Куыстуаты финансон уавæры тыххæй сæ бон нæу нæ тендерты архайын, нæ арæзтадон, цалцæггæн æмæ æндæр куыстытæ кæнын. Коллективы уæнгты хъастмæ байхъуыснымæ хуынд æрцыд Хицауады сæрдары хæдивæг Базраты Валентин. Митинджы архайджытæ бадомдтой, цæмæй сын сæ фæрстытæн дзуапп радта фæндæгтæ цалцæггнæн-арæзтадон управленийы раздæры разамынд. Сæ хъуыдымæ гæсгæ, куыстуат къуырцдзвæнмæ уыдон æртардтой.
Цогойты Аслан, куыстуаты реконструкции æмæ арæзтады хайады сæргълæууæг: «Æз ардæм кусынмæ куы рбацыдтæн, уæд уавæр æндæр уыди. Ныр та ма бакæсут. Хъыг у адæмæн. Ахæм куыстуат д районы уæд, æмæ æндæр рæттæм кусынмæ цу. Уый раст нæу».
Алагиры фæндæгтæ цалцæггæнæн-арæзтадон управлени хæс цы акционертæй дары, уыдон ныридæгæн сæ хъæстытæ балæвæрдтой тæрхондæттæм. Сæ исбоны иу хайыл сын арест сæвæрдтой. Акционерон æхсæнадæн йæ бон нæу административон ресурстæй пайда кæнын. Фæлæ уæддæр хицауады сæрдары хæдивæг Базраты Валентин коллективæн сæ фарста алыг кæнынæй æмæ уавæр хуыздæрырдæм аивынæй зæрдæ бавæрдта.
Фидараты Маринæ
