филиал вгтрк государственная телерадиовещательная компания “Алания”

Дзæуджыхъæуы 13-æм скъолайы уыд ирон æвзаг æмæ литературæйы ахуыргæнджыты республикон конкурс Хетæгкаты Къостайы номыл преми райсыныл. Архайынц дзы 10 адæймаджы. Ерыс арæзт æрцыд ахуырады æмæ наукæйы кусджыты профцæдисы æмæ ахуырады æмæ наукæйы министрады хъæппæрисæй. Йæ хатдзæгтæ сбæрæг уыдзысты ног къуыри.

Хетæгкаты Къостайы номыл преми райсыныл конкурс байгом кодтой 13-æм скъолайы ахуырдзаутæ. Костайы æнæмæлгæ уацмыс «Мæ Иры фæсивæд»-ы ныхæстæ ахсджиаг сты абоны царды дæр – уый уыд конкурсы архайджыты æмæ уазджыты иумæйаг хъуыды. Зындгонд фыссæг цы рухстауæн куыст кодта, уый кæронмæ хæццæ кæныны æмæ ирон æвзагæн аргъ кæныны нысанимæ конкурсы архайджытæ сæхи цæттæ кодтой интеллектуалон ерысмæ.

Тадтаты Заремæ, Æрхонкæйы 1-æм скъолайы ирон æвзаг æмæ литературæйы ахуыргæнæг, конкурсы архайæг: «Конкурсмæ æрбацыдтæ, уæд иннæты куыстмæ кæсыс, иннæ архайджыты куыстмæ, æмæ уыд дæр дæ зæрдæмæ цæуы, цыдæр дзы растай, спайдадзы кодтай дæ куысты, уый дæр тынг ахсдзиаг у. тынг бузныг зæгъын нæ конкурс аразджытæн. Ахæм конкурсты архайгæйæ ахуыргæнджытæ кæрæдзиуыл æмбæлынц, размæ цæуынц æмæ сæ куыст уымæ рæссугъддæр кæнын. Алы урокмæ дæр хъæуы цæуын афтæ, цы сывæллонмæ æрбацыдтæ, уый дæ куыд бамбара, цы йын хъавыс зæгъынмæ. Йæ зæрдæйы йæ нывæра, цы йын дзуры, уый. Æрмæст афтæ нæ, мæнæ æрбацыдис, йæ урок фæцис, фестад æмæ алыгъди. Нæ… хъуамæ куы ацæуа æддæмæ, уæд хъуыды кæна, абон уый базыфдтон æмæ мын æй ахуыргæнæг загъта».

Ахуыргæнджыты ерыс арæзт уыд æртæ къæпхæнæй – хи презентаци скæнын, урок дæттыны фæтк равдисын æмæ фæллойы кодексы тыххæй зонындзинæдтæ раргом кæнын. Жюрийы уæнгтæ разыйæ баззадаысты, ахуыргæнджытæ сæхи куыд равдыстой, уымæй.

Хъайтыхъты Тамарæ, конкурсы жюрийы уæнг: «Ирон дзырд кæмæн рæсугъддæр уайы. Ацы хатт та ирон æвзаджы ахуыргæнджыты æрæмбырд кодтой æмæ сын ахæм хæс сæвæрдтой, цæмæй равдисой сæ презентацитæ, равдисой цавæр ахуыргæнджытæ сты. Æрыгон ахуыргæнджытæ сты æмæ алкæйы дæр сæ фæнды, цæмæй фыццаг бынат бацахса æмæ уый сæйраг нæу, фæлæ кæй архайынц, æмæ кæй тырнынц æмæ кæй тырнынц ногдзинæдтæ базонын ирон æвзаджы, ирон культурæйы æмæ ирон аив ныхасы, уый сæйрагдæр у ацы конкурсы».

Конкурс арæзт æрцыд ахуырады æмæ наукæйы кусджыты профцæдисы æмæ ахуырады æмæ наукæйы министрады иумæйаг хъуыдымæ гæсгæ. Уæлахиздзауæн та лæвæрд æрцæудзæн Хетæгкаты Къостайы номыл профцæдисон преми. Уæвгæ, конкурс дæр баст у ирон литературæйы бындурæвæрæджы райгуырды 155 азы юбилеимæ.

Тезиаты Таймураз, РЦИ-Аланийы ахуырады æмæ наукæйы кусджыты профцæдисы сæрдар: «Мах суынаффæ кодтам нæ республикæйы ахуырады министрадимæ, республикæйы профцæдисимæ иумæ саразын ацы конкурс. Йæ фыццаг нысан у, цæмæй нæ рæзгæ фæлтæр æнувыддæр уой нæ ирон æвзагыл, ирон намысыл, ирон æгъдауыл, уый тыххæй сарæзтам ацы конкурс. Нæ ирон æвзаджы ахуыргæнджытæ рæхгæ фæлтæримæ дзурынц Къостайы æвзагыл, æмæ уыцы æвзаг рох куыд нæ кæнæм, фæлæ йæ дарддæр куыд хæццæ кæнæм нæ рæзгæ фæлтæртæм».

Конкурс арæзт æрцыд 13-æм скъолайы. Абон сæ зонындзинæдтæ æмæ ирон æвзагмæ уарзондзинад равдыстой 10 ахуыргæнæджы республикæйы скъолатæй. Се ппæт дæр бацархайдтой сæ миддуне раргом кæныныл. Интеллектуалон ерысæн хатдзæгтæ скæндзысты ног къуыри.