Йæ райгуырæн хъæу Нары ирон литературæйы бындурæвæрæджы юбилей сбæрæг кодтой ивгъуыд сабаты. Арæзт æрцыд фольклорон фестиваль «Вселенная – Отечество мое». Ирыстоны номдзыд поэты ном æрхъуыды кæнынмæ бирæ адæм æрæмбырд бæстæйы регионтæй æмæ фæсарæнтæй.
Хетæгкаты Къостайы райгуырдыл 155 азы кæй сæххæст, уый кадæн мадзæлттæ Нары райдыдтой поэты цыртдзæвæны цур. Монументыл дидинджытæ сæвæрдтой Цæгат Ирыстоны разамынды минæвæрттæ. Хуссар Ирыстоны президент Тыбылты Леонидимæ республикæйы сæргълæууæг Мамсыраты Таймураз бабæрæг кодта ирон литературæйы бындурæвæрæджы хæдзар-музей.
Фольклорон бæрæгбон «Вселенная – Отечество мое» байгом кодтой бæхты театр «Нартæ»-йы артисттæ. Уазджытæн раарфæ кодта Мамсыраты Таймураз.
Къостайы бæрæгбон баиу кодта цалдæр стыр культурон проекты. Сценæйы сæ арæхстдзинад æвдыстой æппæтадæмон кафæн фестиваль «Аланийы суæхсидты» архайджытæ. Фысджытæ кастысты Къостайы, стæй йын йæхиуыл кæй ныффыстой, уыцы æмдзæвгæтæ.
Иу иннæйы фæстæ сценæмæ рацæуынц республикæйы сфæлдыстадон къордтæ æмæ эстрадон зарæггæнджытæ. Хъуысынц æрмæстдæр ирон æвзагыл зарджытæ. Уый у «Ирон зарæджы» фестивалы финал. Ацы аз æй бацæттæ кодтой Къостайы юбилеймæ.
Кокайты Тотрадз, УФ-йы фысджыты Цæдисы уæнг: «Ацы аз республикæйы Къостайы азыл нысангонд æрцыд, стæй ма у Шекспиры аз дæр. Уымæ гæсгæ мæ фæнды Шекспиры сонеттæй иу бакæсын. Кæддæр сæ ратæлмац кодтон ирон æвзагмæ. Ам Нары уыцы ныхæстæ куы хъуысой, уæд æвзæр нæ уыдзæн».
Фольклорон фестивалы режиссер Сæлбиты Аким куыд зæгъы, афтæмæй ирон адæмы номдзыд поэты бæрæгбон цæттæ кæнын ын уыдис тынг бæрнон.
Сæлбиты Аким, Уæрæсейы аивæдты сгуыхт архайæг: «Къоста ирон адæмæн у йæ тырыса. Фæндыдис мæ, цæмæй ам æрæмбырд уой сфæлдыстадон къордтæ æмæ адæм зæгъой: «Къоста абон дæр бирæ фысджытæй æрыгондæр у».
Сæдæгай адæм æрæмбырд сты Нары хъæуы. Республикæйы Хицауады, сфæлдыстадон интеллигенцийы минæвæрттæ, хуымæтæг цæрджытæ. Алы къабæзты архайæг адæмы баиу кодта Хетæгкаты Къостайы сфæлдыстадмæ уарзондзинад.
Плиты Фатимæ: «Абон цас адæм æрæмбырд алы бæстæтæй æмæ регионтæй. Уый тынг æхсызгон у. Къоста ныр цал азы нал ис, æмæ уæддæр адæмы æнгом кæны».
Къостайы юбилеймæ республикæйы мыхуыры рацыд цалдæр ног чиныджы. Уазджытæн сæ сæ бон балхæнын уыд, Нары уый тыххæй цы сæрмагонд бынæттæ байгом кодтой, уым.
Къостайы юбилейы кадæн мадзæлттæ республикæйы уыдзысты азы кæронмæ. Поэты райгуырæн хъæумæ æрцæуын абон кæмæн нæ бантыст, уыдон та Нары æрæмбырд уыдзысты 15 октябры. Поэты хæдзар-музейы арæзт æрцæудзæн театрализацигонд равдыст.
Хъайтмазты Дзерассæ
