4 азы размæ Битарты бинонтæ æрцардысты ног хæдзары Алагиры. Екатеринæ йæ цæрдæмбалимæ хъомыл кæны 5 сывæллоны, ис сын хъæбулы хъæбул дæр. Фæлæ сæ ног бынаты æрдзон газ нæ уыд, æмæ тынг тыхстысты. Куыстуат «Газпром межрегионгаз Пятигорск»-ы разамынд бинонтæн ацы хъуыддаджы баххуыс кодта. Ныр зымæг æнæ къуылымпыдзинæдтæй арвитдзысты.
Чысыл Ибрагимæн ныр ис йæхи машинæ. Куыстуат «Газпром межрегионгаз Пятигорскы» цæгаирыстойнаг филиалы разамынд æрмæст ахæм лæвар не скодта Битарты бинонтæн. Организаци сын баххуыс кодта сæ сæйраг лыггæнинаг фарста аиуварс кæнын – балхæнын æмæ сæвæрын газы ифтонггæрзтæ. Зымæгон уазæлтты агъоммæ ацы хъуыддаг уæлдай ахсджиаг у.
Бутаты Хъасполат, куыстуат «Газпром межрегионгаз Пятигорск»-ы цæгатирыстойнаг филиалы директор: «Тынг рæсугъд бинонтæ сты. Фæкастыстæм сæм цалцæггæнæн æрмæджытæй, хъармгæнæн дзы сауыгъдтам. Махæй цыгæнгæ уыдис, цæмæй сæ зымæг хъармæй арвитой, уый скодтам. Хæринаг цæуыл кæной, ахæм плита дæр сæвæрдтам, газнымайæн дæр. Ахæм бинонтæн хъуамæ йæ бон кæмæн, уыдон æххуыс кæной арæхдæр».
Ацы хæдзармæ Битартæ раивтой 4 азы размæ. Цæрынц дзы Екатеринæ йæ цардæмбалимæ, сæ 5 сывæллоны, чындз æмæ сæ фырты фырт Ибрагим. Бинонтæн хæдзар саразын бирæ адæм баххуыс кодтой – бынæттон администраци, хæрзаудæн организацитæ, хиуæттæ æмæ хæлæрттæ. Фæлæ æппæт уыцы рæстæг хæдзары нæ уыдис сæйрагдæр – æрдзон газ. Хæринаг кодтой буржуйкæ пецы, пайда кодтой электрон хъармгæнæнтæй. Уазал кæй уыдис, уый тыххæй сывæллæттæ æдзух кодтой рынчын, зæгъы Екатеринæ.
Кæсæбиты Екатеринæ: «Газ æрбауадзынмæ бирæ фæрæзтæ хъæуы, уыйбæрц нæ къух нæ амыдта. Куы иу гæххæтт хъуыд, куы иннæ. Нæ нын уадис. Тынг зын уыдис æнæ газæй. Нæ хæринаг скæндзынæ рæстмæ. Ирон хæдзары 3 кæрдзыны куы нæ скæнай, уæд уый куыд у».
Æххуысагур Екатеринæ бацыд сывæллæтты Æппæтуæрæсеон фонды республикон хайадмæ. Йæ сæрдары хæдивæг Денис Федорович ацы бинонты тыххæй радзырдта «Газпром межрегионгаз Пятигорск»-ы разамонæгæн. Организациимæ ныр цалдæр азы æмуыстад кæнынц.
Бинонтæм ма ис æндæр лыггæнинаг фарстатæ дæр. Фæлæ уыдон сæхæдæг сæххæст кæндзысты. Ныр хæдзары газ куы фæзындис, уæд сæ бон у цалцæг скæнын дæр, сæйрагдæр та – хинайæн агъуыст саразын.
Хъайтмазты Дзерассæ
