Куыд зæгъы, афтæмæй сæхи бæстæ кæй цæгъды, уыцы адæмы рыстмæ йæ бон куыдфæндыйы цæстæй кæсын нæ бацис. Ацæмæз ныфсхаст æмæ уæндонæй хæцыд, æмæ æххуыс кодта сабыр цæрджытæн. Фæлæ фæци уæззау цæф. Ныртæккæ йын йе нæниздзинад дзæбæх кæнынц Беслæны медицинон центры. Лæгдзинады тыххæй не мзæххон хорзæхгонд æрцыди «Ирыстоны намысы» майданæй.
Рынчындоны уæвгæйæ дæр 29 аздзыд лæппу йæ цæст дары Украинæйы цаутæм. Тыхсы æмæ мæт кæны æнаххос адæмыл. Ацæмæз фæцæф июны, украинаг горæт Снежное хæстон цауты рæстæг. Уыцы горæт у, стратегион территорий. Донецкы республикæмæ ууылты ласынц гуманитарон уæз Уæрæсейæ.
Фыццаг уал Ацæмæзæн медицинон æххуыс кодтой Донецкы рынчындоны. Йæ цуры æппынæдзух уыдысты бынæттон ирон диаспорæйы минæвæрттæ. Уый фæстæ йæ раивтой Ростовмæ, уырдыгæй та Цæгат Кавказы бирæвæрсыг медицинон центрмæ.
Саулохты Ацæмæз 4 æфсымæрæн у сæ хистæр. Украинæмæ цæуынвæнд скодта, уый йæ хиуæттæй ничи зыдта. Куы цыди, уæд йæ бинонтæн загъта, Ростовы облæстмæ кусынмæ цæуын, зæгъгæ.
Йæ райгуырæн хæдзарæй дард чи цæры, уыцы адæмы рыст ацæмæз йæ зæрдæмæ айста хæстæг.
Бархионыл йæ хæдзары сæмбæлдысты æмбæлгæ хуызы. Бæрæг æй кæнынц, йе сгуыхтдзинæдтæн ын стыр аргъ чи скодта, уыдон иууылдæр. Ирыстоны кадджындæр хæрзиуæг дæр ын хуымæтæджы нæ саккаг кодтой.