филиал вгтрк государственная телерадиовещательная компания “Алания”

Цæгат Ирыстоны хæс энергетикты раз у 4 миллиард сомæй фылдæр. Уыцы хæс сæвзæрд фæстаг 10 азмæ. Ууыл ныхас кодтой республикæйы сæргълæууæджы хæстæ рæстæгмæ æххæстгæнæг Битарты Вячеслав æмæ «Россети»-йы генералон директор Олег Бударгин. «Россети»-йы разамонæг куыд загъта, афтæмæй йын зындгонд у, цæрджытæн сæ фылдæр хай, куыд æмбæлы, афтæ кæй фидынц, уый. Фæлæ-иу æхца цы фесты, уый хъуамæ сбæрæг кæной барадхъахъхъæнæн оргæнтæ. Цæмæй ахæм уавæр мауал уа, уый тыххæй Æфснайæн банчы арæзт æрцæудзæн нымайæн центр. Адæм зондзысты, кæдæм, æмæ цæй тыххæй фидынц, уый. Фембæлды загътой, республикæйы арæзт кæй æрцæудзæн цæстдарæн совет. Æркæсдзæн Цæгат Ирыстоны электрон къабазы уавæрмæ, рабæрæг кæндзæн риссагдæр фарстатæ. Олег БударгИн фехъусын кодта, ацы азы кæронмæ кусын кæй райдайдзæн дæлстанцæ «Парковая». Фæзындзæн æм ног хæдзæрттæ баиу кæныны фадат. Иннæ аз ма фæнд кæнынц ноджыдæр иу дæлстанцæ саразын. Горæты администрацийы сæргълæууæг Æлбегаты Барис загъта, куыстуат «Дзæуджыхъæуы доны хæдзарад» энергетиктæй 173 милуан сомы кæй дары. Ракуырдта, цæмæй ацы хæс реструктуризацигонд æрцæуа, æмæ йæ 10 азмæ бафидой. «Россети»-йы разамонæг загъта, ацы фарстамæ дæр кæй æркæсдзысты, уый.
Битарты Вячеслав, РЦИ-Аланийы сæргълæууæджы хæстæ рæстæгмæ æххæстгæнæг: «Цыдæриддæр фарстатæ уыдис, ног постанцæ саразын, афоныл адæммæ куыд æмбæлы, афтæ ток лæвæрд куыд цæуа, стæй МРСК-йы кусджытæй цæрæн бынæттæ кæмæн нæй, уыдонæн ахæм гæнæнтæ саразыныл дæр ныхас кодтам. Олег Михайлович загъта, алцыдæр кæй бакæндзæн, уый тыххæй. Мах дæр нæхирдыгæй бакусын хъæуы, цæмæй цы ток исæм, уымæн æхца афоныл фидæм. Уымæн æмæ уый раст нæу. Мах токæй пайда кæнæм, фæлæ йын æхца нæ фидæм. Уæд уыдонæн дæр сæ бон нæу ног подстанцæтæ аразын, цалцæг кæнын телтæ. Æмæ бакусын хъæуы, цæмæй афоныл фидæм токæн, ууыл».