филиал вгтрк государственная телерадиовещательная компания “Алания”

Ног æфтиæгтæ агургæйæ, бæстæйы фылдæр адæм се ‘ргом здахын райдыдтой сæрмагонд инвестицитæм. Ома, арæхдæр æлхæнынц облигацитæ кæнæ акцитæ. Уый у тæссаг – ахæм зынаргъ гæххæттытæ æвæрæнты фæдзæхстады системæмæ нæ хауынц. Фæлæ уый бирæты нæ уромы. Ацы аз мартъийы къабазы биржæты базарты бæрц 2 триллионæй фæфылдæр. Уый æндæразимæ абаргæйæ у, 60%-ы фылдæр. Сæрмагонд инвестор суæвын куыд ис, уый базоныныл бацархайдта нæ уацхæссæг Хъайтмазты Дзерассæ.

Банчы æвæрæнтæн альтернативæ – акцитæ æмæ облигацитæ. Уыдон сты финансон инструменттæ. Сæ фæрцы ис фæхуыздæр кæнын хи экономикон уавæр. Акци у уæ хай бизнесы. Уый æххуысæй ис æхца бакусын, пайдаджын финансон операциты архайгæйæ. Облигаци у зынаргъ гæххæтт. Хуымæтæг ныхасæй та, уæ размæ хæсджын уыдзæн, зæгъæм, компани кæнæ та æнæхъæн бæстæ.

Инвестицитæ кæддæриддæр тæссаг вæййынц. Фæрæзтæ гæнæн ис, æмæ фылдæр кæной, гæнæн та ис, æмæ къаддæр кæной. 2008-æм азы Хуырымты Дмитрий бахаста стыр суммæ. Фæлæ ныр йæ фæрæзтæ фæфылдæр сты.

Фыццаджыдæр, райдайæн инвесторæн ахсджиагдæр хъуамæ уа ахуырдзинад. Уыцы хъуыддаджы баххуыс кæндзæн интернет æмæ биржæты, кæнæ стыр брокерон компаниты сайттæ. Брокерон хыгъд байгом кæнын ис хæдзары интернетæй пайдагæнгæйæ, кæнæ та брокерон компанийы офисы. Æнæмæнг базонын хъæуы Уæрæсейы Банчы лицензи сæм ис æви нæй. Акцитæм æмæ облигацитæм фæрæзтæ хæссын 3 азæй фылдæр чи фæнд кæны, уыдонæн гæнæн ис, æмæ ъхуыздæр уыдзæн, брокерон нæ, фæлæ сæрмагонд инвестицион хыгъд байгом кæнын. Афтæ зæрдæ дарæн ис, æрвылаз хъалонтæ къаддæр фидын кæй хъæудзæн, ууыл. Ныр чи парахат кæны, уыцы базар «форекс»-имæ æмгуыстад кæнын та райдайæн инвестортæн эксперттæ нæ уынаффæ кæнынц – алцыдæр фесафыны гæнæн стыр у.

Æппæт ацы хабæрттæ сахуыргæнгæйæ ис æхца кусын, сæйраг хъуыддæгтæй ма фæхицæн уæвгæйæ.