30 лæппуйы се фсæддон хæс æххæст кæндзысты Уæрæсейы алы рæтты: æфсæнвæндаджы, фистæгæфсæддонты, космосон æмæ гвардийы æфсæдты.
Цæгат Ирыстоны æфсæддон комиссарадæй
сиддонты кадджын уавæры арвыстой службæ кæнынмæ. 30 лæппуйы се фсæддон хæс
æххæст кæндзысты Уæрæсейы алы рæтты: æфсæнвæндаджы, фистæгæфсæддонты, космосон
æмæ гвардийы æфсæдты. Иннæ къорд дæр йæхи цæттæ кæны æфсады рæнхъыты
æрлæууынмæ. Æдæппæтæй та нæ республикæйæ гæрзифтонг тыхты службæ кæнынмæ
ацæудзæн 710 лæппуйы.
Республикæйы
æфсæддон комиссарады се рвитыны радмæ æнхъæлмæ кæсынц, Райгуырæн бæстæ
хъахъхъæнынмæ кæмæ фæсидтысты, уыцы фæсивæд. Ныстуанимæ фидæны æфсæддонты
фæндараст кæны ветеранты советы уæнг Рæмонаты Алыксандр. Ныридæгæн уал се
фсæддон хайæдтыл сæмбæлдысты сæдæ сиддоны. Ныртæккæ та Цæгат Ирыстонæй æрвитынц
æртын лæппуйы. Уыдонæй алчидæр цæттæ у йе фсæддон хæс æххæст кæнынмæ. Æфсæддон
комиссарадмæ æрбацыдысты барвæндонæй. Сæ фылдæрмæ ис уæлдæр ахуырад. Дедегкаты
Геннадийыл цæуы дыууын æхсæз азы. У Цæгат Ирыстоны паддзахадон университеты
экономикон факультеты рауагъдон. Ныртæккæ йæ зæрды ис йе фсæддон хæс сæххæст
кæнын. Фæндыд æй службæ кæнын фистæгцæуæг æфсæдты. Йæ фæнд сæххæст.
Æфсæддон
коммиссарад бацæттæ кодта, фидæны салдæтты фыццаг рæстæг цытæ хъæудзæнис, уыдон
се ппæтдæр. Алы сидтонæн дæр радтой хызын. Ис дзы уæлæдарæс, хихсæнтæ, æмæ ма
суанг хъарм кæрцытæ дæр, цæмæй сæ уазал ма бахъыгдара.
Цæгатирыстойнаг
сиддонтæ се фсæддон хæс æххæст кæндзысты æфсæнвæндаджы, æфсæддон-космосон
хайадты, стæй гвардийы. Уæлдай тынгдæр аргъ кæнынц, машинæ скъæрæг бартæ кæмæ
ис, уыцы лæппутæн. Арвитыны размæ фидæны æфсæддонты æнæниздзинад сбæрæг кодтой
дохтыртæ.
Сиддонты
иннæ къорд цæттæ кæны æрвыстмæ. Ацы аз Цæгат Ирыстонæй йæ фсæддон хæс æххæст
кæнынмæ Уæрæсейы гæрзифтонг тыхты рæнхъыты æрлæудзæн авдсæдæ дæс æрыгон
лæппуйы.
«Иринформ»
