Сайраг темитæ:
Цæгат Ирыстоны коронавирусимæ уавæр зæрдæхсаинаг нæу – хъусын кæны Уæрæсейы фæлхасадмæ цæстдарды цæгатирыстойнаг управлени. Рынчынты бæрцыл нæ бафтыд, фæстаг хатт та инфекции нæ регионы территорийыл рабæрæг дыууæ къуырийы размæ. Ахæм уавæр ис иннæ регионты дæр. Уæ зæрдыл уын æрлæууын кæндзыстæм – абон æнæниздзинадхъахъхъæнынады дунеон организаци фехъусын кодта, коронавирусæй рынчынты нымæц æвиппайды æхсай фондз проценты кæй фæфылдæр, уый тыххæй.
Цæгат Ирыстоны æвзарæн къамисы уæнгтæ æрзылдысты дæс мин хæдзарыл. Ныхас кодтой æвзарджытимæ æмæ сын дзырдтой хъæлæс кæныны боны фæткы æмæ кандидатты тыххæй. Къамисы уæнгтæ архайдтой фæлварæн проект «Мобилон бынæттон æвзарæн къамисы» домæнтæ æххæсткæнгæйæ. Специалисттæ пайда кæнынц сæрмагонд программæ, кæцымæ хæссынц æвзарджыты тыххæй бæрæггæнæнтæ. Базонæн сæ ис сæрмагонд уæлæдарæсмæ гæсгæ. Æвзарæн къамисы уæнгтæ хæрдзæрттыл зилдзысты дыууынæм августмæ. Мадзалы дыккæгæм къæпхæн райдайдзæн 25 августы æмæ ахæсдзæн 6 сентябырмæ. Уæ зæрдыл уын æрлæууын кæндзыстæм – 9 æмæ 10 сентябры Цæгат Ирыстоны дæс районы ацæудзысты æвзæрстытæ бынæттон хиуынаффæйады оргæнтæм.
Цæгат Ирыстоны пъæлицæйæгтæ расидтысты æрвылмæйон оперативон профилактикон акцитæ Ночь æмæ Район. Сӕ нысан у административон барадхӕлдтытӕ ӕмӕ ӕндӕр фыдракӕндтӕ ма руадзын, стӕй ӕхсӕнадон фӕткмӕ ӕхсӕвыгон цӕст дарын. Мидхъуыддӕгты министрад куыд хъусын кӕны афтӕмӕй уыцы ӕмгъуыд пъӕлицӕйӕгтӕ зилдзысты ӕмӕ бӕрӕг кӕндзысты, адӕм фылдӕр цы бынӕтты ӕмбырд кӕнынц уыдон. Уымӕй уӕлдай кæсдзысты мигранттӕ, фӕндаджы змӕлды ӕгъдӕуттӕ халджытӕ, стӕй барадхъахъхъӕнӕг оргӕнты хыгъды чи лӕууы уыцы адӕмимӕ. Акцийы домӕнтӕ ӕххӕсткӕнгӕйӕ пъӕлицӕйӕгтӕ бабӕрӕг кӕндзысты ӕфсӕйнаг исӕн пункттӕ дӕр. Мадзæлттæ цæудзысты абон æмæ райсом
Сывæллæтты технопарк Кванториум йæ фидæны ахуырдзауты хоны дæсныйадæвдисæг ахуыртæм. Архайыны бар дзы ис фæндзæмæй иуæндæсæм кълæсты ахуырдзаутæн. Сывæллæтты адих кæндзысты дыууæ къордыл. Уыдзæнис дзы фыццæгæм æмæ дыккæгæм сменæ. Ахуыртæ цæудзысты къуыри иу кæнæ дыууæ сахаты æмæ сты лæвар. Ахуыры къабаз равзарын æмæ курдиат бадæттын ис сайт кванториум15ру-йы уылты. Технопарчы куыд зæгъынц, афтæмæй сывæллæтты сæрмагонд цæттæдзинад нæ хъæуы. Ахуыртæ райдайдзысты 4 сентябры. Уымæй уæлдай дзы уыдзæнис сæрмагонд хайад цыппæрæм кълæсты ахуырдзаутæн. Амондзысты сын нымæцон технологиты бындурон миниуджытæ.
Хæстæгдæр суткæйы дæргъы нæ республикæйы рæстæггай уыдзæн асæст, ранæй рæтты уардзæн, æрцæудзæн тæрккъæвдатæ. Быдыры районты æмæ хохрæбынты тæссаг у зынгсирвæзтытæй. Атмосферæйы æлхъывдад 701 миллиметры, уый у нормæмæ æввахс.. Уæлдæфы уымæлад 45 проценты. Уæлдæфы температурæ республикæйы æхсæвы 16-21 градусы, бонæй 27-32 градусы хъарм. Дзæуджыхъæуы æхсæвы 16-18 градусы, бонæй 27-29 градусы хъарм.
