Ацы азы 1-æм январæй адæм курдиæттæ дæттын райдыдтой универсалон картæтæ райсыны тыххæй. Уыдоны фæрцы æнцонæй пайда кæнæн уыдзæн электрон лæггæдтæй.
Курдиат бадæттæн ис æфснайæн банчы офистæм кæнæ информатизаци æмæ бастдзинады комитеты сайтмæ. Хъæуы дзы паспорт, хуызист, медицинон фæдзæхстады полис, пенсион фæдзæхстады полис, электрон къухфыст æмæ хъалонисæджы хи номыр.
Фыццаг электрон картæтæ цæттæ уыдзысты февралы райдиан. Сæ ахадындзинад уал сын сбæрæг кæндзысты æххæстгæнæн хицаудзинады оргæнтæ. Картæ райсын сæ бон у, кæй фæнды, уыдонæн се ппæтæн дæр. Ныридæгæн курдиæттæ балæвæрдтой 200 адæймаджы.
Картæтæй пайда кæныны бар ис, алы кары адæмтæн дæр. Æрмæст 14 азы кæуыл нæма сæххæст, уыдонæн банчы уæлæмхасæн лæггæдтæй сæ бон пайда кæнын нæ уыдзæн. Картæйы фæрцы уыдзæн дохтырмæ хи ныффыссæн, ивартæ æмæ паддзахадон фиддонтæ бафидын. Иу ныхасæй, ацы хъуыддæгтæм адæмы раздæрау сахатгай рады лæууын нал хъæудзæн.
