13 сомæй схиздзæн 25 соммæ
1-æм июлæй фæстæмæ фæзынаргъдæр уыдзæн трамвайты цæуыны аргъ. 13 сомæй схиздзæн 25 соммæ. Специалисттæ куыд зæгъынц уымæ гæсгæ, уавæр баст у вагæттæм зилынимæ æмæ инфраструктурæ фæстаг рæстæг кæй фæзынаргъдæр сты, уыимæ. Ныртæккæ куыстуаты ис 28 ног вагоны, зилынц инфрастуктурæмæ дæр. Чехойты Фатимæ радзурдзæн бæстондæр.
Феликс Киреев алы бон дæр куыстмæ цæуы трамвайыл, кæцы æрмæст Дзæуджыхъæуы историон бæрæггæнæн нæу, фæлæ у, адæм – уæлдайдæр та горæты астæу чи цæры, уыдон арæх кæмæй пайда кæнынц, ахæм æхсæнадон транспорт, зæгъы ахуыргонд. Фæлæ трамвайты куыстмæ курдиæттæ бахæссынц Дзæуджыхъæуы иннæ районты цæрджытæ дæр.
1-æм июлæй фæстæмæ трамвайы цæуыны аргъ 13 сомæй схиздзæн 25 соммæ. Куыстуаты куыд фæбæрæг кодтой, уымæ гæсгæ аргъыл 1-æм январæй бафтауын нысан кодтой. Фæлæ ма уæддæр афæдзы *рдæг адæмæн лæггад кодтой, аргъ нæ ивгæйæ.
Цæрджыты та тыхсын кæны трамвайты куысты фæтк. Фæнды сæ, ацы æхсæнадон транспорт афойнадыл куы цæуид, уый.
Трамвайтæ фæткмæ гæсгæ кæй нæ цæуынц, уый куыстуаты куыд æмбарын кæнынц, уымæ гæсгæ баст у шофыртæ кæй нæ фаг кæны, уыимæ. Ныртæккæ уыцы фарстыл цæуы куыст. Ацы æхсæнадон транспорты фæтк ма фæкъуылымпы вæййы, электрон тыхы телтæ скъуыд куы *рцæуынц, уæд, æмæ фæндаггон фыдбылызты рæстæг дæр, зæгъынц специалисттæ.
Дзæуджыхъæуы трамвайы риссаг фарстатæ иуварсæй бакæсгæйæ дæр зынынц. Ахæм уавæры ис йæ фæндаг Калинины уынджы. Æрлæууæнтæ дæр сты базилинаг. Хистæр кары адæмæн та вагонмæ схизын дæр æнцон нæу – бæрзонд сты сæ къæпхæнтæ. Куыстуаты материалон-техникон уавæр рагæй нæ дæтты дзуапп нырыккон домæнтæн.
Трамвай у Дзæуджыхъæуы фыццаг æхсæнадон транспорт. 120 азы *мгъуыдмæ йæ хæс адæмы царды на ивта – æнусы размæ куыд ахсджиаг уыдис, афтæ у ныр дæр.
