Кусгæ чи нæ кæны, уыцы адæмæн сæ пенситæ индексаци скæндзысты 10%
1-æм июнæй фæстæмæ сæ тыхы бацыдысты ахсджиаг ивддзинæдтæ. Кусгæ чи нæ кæны, уыцы адæмæн сæ пенситæ индексаци скæндзысты 10%. Фæфылдæр уыдзысты цæрыны æппынкъаддæры бæрц, стæй пособитæ æмæ фиддонтæ. Уæдæ уæлдæр ахуыргæнæндонмæ бацæуыны хъуыддаг дæр аивдзæн. Ацы, æмæ æндæр ивддзинæдты тыххæй бæлвырддæр радзурдзæн Гæджиты Сослан.
Июны сæ тыхы бацыд цалдæр закъоны. Баст сты социалон къабазимæ, æмæ сæ нысан у Уæрæсейæгты цард фæхуыздæр кæнын. Афтæ паддзахадон æххуысы тыххæй закъон фадат ратдзæн, йе нæниздзинад хъыгдард кæмæн у, уыцы сывæллæттæн пенситæ бахъахъхъæнынæн. Ахæм ивддзинæдтæ хауынц, дарæг кæмæн нæй, æмæ уæлдæр ахуыргæнæндонмæ чи цæуы, уыдонмæ дæр. Раздæр уыцы фиддонтæ лæвæрдтой æрмæстдæр скъола каст фæуыны онг. Фæфылдæр уыдзысты нæ бæстæйы экономикæйы программæты магистратурæйы бюджетон бынæттæ.
Дыккаг хатт индексацигонд æрцæудзысты пенситæ дæр. Фыццæгæм июнæй фæстæмæ 10% фæфылдæр уыдзысты, кусгæ чи нæ кæны, уыцы пенсиисджыты фиддонтæ. Январы индексаци уыд 8 æнæхъæны æмæ 6 дæсæм хай проценты. Экспертты ныхæстæм гæсгæ, пенситæ инфляцийы æмвæзадæй фæфылдæр сты. Фæфылдæр уыдзæн цæрыны æппынкъадæры бæрц дæр. Уый фæдыл уагæвæрд бафыста Уæрæсейы Премьер-министр Михаил Мишустин. Уый тыххæй федералон бюджетæй радих кодтой 500 миллиард сомæй фылдæр.
Ивддзинæдтæ хаст æрцыдысты физкультурæйы æмæ спорты тыххæй Федералон законмæ. Нырæй фæстæмæ алы спортуарзæг дæр хъуамæ райса сæрмагонд картæ. Æнæ уымæй матчмæ билет балхæнæн, стадионмæ кæнæ спорткомплексмæ бацæуæн нæ уыдзæн. Сæрмагонд электрон документ сфидар кодтой, цæмæй стадионты уа æдас. Фæлæ уыцы ногдзинадыл се ппæт æмхуызон нæ сæмбæлдысты. Ис йæ ныхмæ дзурæг адæм дæр.
Иумæйаг системæмæ бахæссын фæнд кæнынц канд спортуарзджыты нæ, фæлæ ма паддзаххадон æххуысхъуаг чи у, ахæм адæм дæр. Фæхъомысджындæр уыдзæн зынгсирвæзты ныхмæ æдасдзинады закъонæвæрынад дæр. 8-æм июны фæфылдæр уыдзæн иварты бæрц, хъæдты зынгсирвæзтыты домæнтæ чи не ххæст кæна, уыдоны ныхмæ.
