Мартъийы сбæрæг кодта йе нусон юбилей, æмæ йын лæвæрд æрцыд «Ирыстоны Намысы» орден
100 аздзыдæй йæ цардæй ахицæн Фыдыбæстæйы Стыр хæсты ветеран Цалиты Сафарби. Мартъийы сбæрæг кодта йе нусон юбилей, æмæ йын лæвæрд æрцыд «Ирыстоны Намысы» орден. Цалиты Сафарбийы хæстон фæндаг у хицæн чиныг ныффыссыны аккаг. Архайдта бирæ ахсджиаг тохты. Се хсæн – Сталинград суæгъд кæныны, стæй Курскы къæлæты тох. Дур-Дуйраг лæппу Сафарбимæ Сырх æфсады рæнхъытæм фæсидтысты, 18 азы йыл куы цыди, уæд. Хæстæн фæцыд йæ райдианæй кæронмæ. Йæ фыдыуæзæгыл куы сæмбæлд, уæддæр æгуыстæй нæ бадти, фæлæ кодта зæрдиаг патриотон æмæ æхсæнадон куыст. Бирæ скодта йæ райгуырæн хъæуæн. Йæ хъæппæрисæй дзы арæзт æрцыд Уæлахизы Парк. Цалиты Сафарби уыд бирæ хæрзиуджыты аккаг. Хорзæхгонд æрцыд Фыдыбæстæйы Стыр хæсты 1-æм æмæ 2-æм къæпхæнты ордентæй, «Хъæбатырдзинады» æмæ «Хæстон сгуыхтдзинæдты» тыххæй майдантæй. Йе стырдæр хæрзиуæгыл та нымадта – адæм ын цы кад кодтой, уый.
