Ныр хæдзар ис территориты рæзты Фонды бæрны, æмæ бæстыхай эксплуатацийы раттын фæнд кæнынц 2023-æм азы кæрон
10 азы дæргъы кæрон кæмæн нæй, ахæм истори. 100 бинонтæй фылдæр фатертæ балхæдтой Тогойы-фырты уынджы хæдзары. Аразæн компанийæн та 2016-æм азы райдыдта банкроты процедурæ. Фарстамæ йе ргом аздæхта республикæйы сæргълæууæг. Ныр хæдзар ис территориты рæзты Фонды бæрны, æмæ бæстыхай эксплуатацийы раттын фæнд кæнынц 2023-æм азы кæрон. Зындæр уавæры ис Владикавказскийы уынджы арæзтад. Цавæр уыдзæн йæ фидæн, уый тыххæй радзурдзæн Гæджиты Сослан.
Рæсугъд æддаг бакаст, цъæх быру, стæй ма Терчы былгæронмæ хæстæг. Дардæй бакæсгæйæ, раст цыма Тогойы-фырты уынджы 22-æм хæдзары æппындæр ницы аипдзинæдтæ ис, афтæ кæсы адæймагмæ. Фæлæ йæм хæстæгдæр куы бацæуай, уæд фенæн ис афтид рудзгуытæ, æмæ пыхсыты бын кæрт. Ацы хæдзар арæзт цыди 2013-æм азæй фæстæмæ. Æппæт 108 фатеры балхæдтой æвæстиатæй. Æмæ уыцы 108 бинонтæ ныр 8 азы дæргъы æнхъæлмæ кæсынц, хæдзар эксплуатацийы кæд ратдзысты, уымæ. 2016-æм азæй фæстæмæ аразæг компани цæуы банкроты процедурæ. Цы бахъыгдардта хæдзар кæронмæ саразын, уый фатерты хицæуттæ не мбарынц, фæлæ сæ ныфс нæ сæтты.
Афæдзæй фылдæр адæм сæ курдиатимæ бацыдысты республикæйы Сæргълæууæгмæ. Сергей Меняйло сын баххуыс кодта. Хæдзар ныртæккæ ис территориты рæзты Фонды бæрны. Сæрмагондæй ахæм фарстатæ лыг кæныны тыххæй арæзт æрцыд. Афтæмæй бæстыхай нысан кæнынц эксплуатацийы 2023-æм азы кæрон раттын.
2023-æм азы ма хъуамæ лыггонд æрцæуа Владикавказскийы уынджы хæдзары цæрджыты фарста дæр. Арæзтад æрдæгмæ дæр конд кæй нæма у, уый тыххæй йæ тагъд рæстæджы нæ фæуыдзысты. Агурын хъæуы ног подрядон организаци, æмæ ногæй юридикон процедурæтæ æххæст кæнын. Уымæ гæсгæ хъыгдардбаййафджытæн фæнд кæнынц компенсацитæ бафидын.
