Уый тыххæй æрвылкъуырион аппаратон æмбырды фехъусын кодта республикæйы хицауады сæрдары хæдивæг Томайты Ирбег
109 уæзласæн машинæйы электрон хуызы сæ радмæ æнхъæлмæ кæсынц уæрæсеаг-гуырдзиаг арæнтыл. Уæвгæ, æдæппæтæй арæнты сæрты ахизынмæ рады ис 330 машинæйы. Уый тыххæй æрвылкъуырион аппаратон æмбырды фехъусын кодта республикæйы хицауады сæрдары хæдивæг Томайты Ирбег. Ивгъуыд къуыри арæнтыл ахызти транспорты 30 мин иуæджы, стæй 85 мин адæймагæй фылдæр. Æмбырды рæстæг Сергей Меняйло бузныг загъта Беслæны саударæн мадзæлтты æмæ æвзæрстыты рæстæг æдасдзинад чи хъахъхъæдта, уыдонæн се ппæтæн дæр. Республикæйы Сæргълæууæг арæзтады министрадæн бахæс кодта, скъолаты бындурон цалцæджы рæстæг æппæт æдасдзинады домæнтæм лыстæг æркæсын æмæ сæ æнæмæнгæй сæххæст кæнын.
Ацы хатт Сæргълæууæг уæлдай тынгдæр æргом аздæхта республикæ хъармгæнæн сезонмæ куыд цæттæ у, уымæ. Республикæйы разамонæг загъта, цæмæй уыцы хъуыддагыл бафтауой прокуратурæйы дæр. Афойнадыл зымæгмæ чи нæ бацæттæ кодта, æмæ аварийон кусæнгарзæй ифтонг цы разамонæг компанитæ нæ уой, уыдонæн байсдзысты сæ лицензитæ.
