Уый фæдыл кадджын мадзæлттæ арæзт æрцæудзысты Хъесаты Колкайы номыл уынджы Терчы былгæрон
Хуыцаубоны, 11-æм октябры Цæгат Ирыстоны сбæрæг кæндзысты республикæйы æмæ Дзæуджыхъæуы бон. Уый фæдыл кадджын мадзæлттæ арæзт æрцæудзысты Хъесаты Колкайы номыл уынджы Терчы былгæрон. Организацион фарстатыл æрдзырдтой кусæг къорды æмбырды. Амыдта йæ вице-премьер Азымты Иринæ. Кæй зæгъын æй хъæуы, пандемия бахаста ивддзинæдтæ. Ацы хатт бæрæгбон афтæ егъау нæ уыдзæн. Фæлхасадмæ цæстдарды республикон управленийы амындмæ гæсгæ, æппæт архайджытæ æмæ уазджытæ дæр хъуамæ æххæст кæной санитарон-эпидемиологон домæнтæ: маскæтæ, æрмкъухтæ æмæ социалн дистанци. Бацæуæны та адæмæн бардзысты сæ буары тæвд. Уыимæ бæрæгбон саразджытæ бацархайдтой, цæмæй се ппæт дæр ацы бон бахъуыды кæной, ууыл. Арæзт æрцæудзысты ирон чъириты, цыхты æмæ бæгæныйы фестивальтæ, нæртон хъæзтытæ, футболон турнир, стæй бæрæгбоны концерт. Æппæты кæстæртæн та кусдзысты сывæллæтты ирхæфсæн зонæтæ аниматортимæ. Кусдзæн æрмдæсныйады равдыст-армукъа дæр. Æмбырды стыр æргом аздæхтой æдасдзинады фарстатæм.