Райдайдзæн 13-æм сентябры Хорватийы сæйраг горæт Загребы
11 ирыстойнаг спортсмены архайдзысты дунейы чемпионаты уæгъдибар хъæбысхæстæй. Райдайдзæн 13-æм сентябры Хорватийы сæйраг горæт Загребы. 74 килограммы онг категорийы ерыс кæндзысты Цæгат Ирыстоны æртæ минæвары. Европæйы ерысты уæлахиздзау Уалыты Чермен – Албанийы номæй, Европæйаг ерысты цыппар хатты уæлахиздзау Салхъазанты Таймураз – Словакийæ, стæй олимпаг чемпион, дунейы æртæ хатты чемпион Сидахъаты Зауырбег. Уыйбæрц ирон спортсмены ма уыдзæн 86 килограммы уæзы. Джиоты Арсений – Азербайджанæй, Фриаты Таймураз – Испанийæ æмæ Махъоты Барис Словакийæ. 125 килограммы категорийы уыдзысты Хуыбылты Ален – Болгарийæ, Хосонты Азæмæт – Грецийæ. Тускъаты Азæмæт хæцдзæн Сербийæн. Ерыс кæндзæн 57 килограммы уæзы. Дыууæ ирыстойнаг легионеры ма Словакийæ Гулаты Æхсарбег æмæ Цæкулаты Батырбег сæ тыхтæ фæлвардзысты 79 æмæ 92 килограммы категорийы. Дунейы чемпионат уæгъдибар, грекъаг-римаг æмæ сылгоймæгты хъæбысхæстæй цæудзæн 21-æм сентябры онг. Турниры архайдзысты дунейы 900 тыхджындæр богалы.
