Уый размæ та арæндоны хæстæ æххæст кодтой æфсæддон госпиталы
120 азы размæ Дзæуджыхъæуы байгом æнхъæлцау сылгоймæгтæн сæрмагонд бынат. Уый размæ та арæндоны хæстæ æххæст кодтой æфсæддон госпиталы. Ныртæккæ нæ республикæйы сæйраг горæты кусы 4 арæндоны. Сылгоймæгтæн æмæ медицинон кусджытæн арæзт æрцыдысты æппæт æмбæлгæ уавæртæ, цæмæй ноггуырдтæ уой æнæниз æмæ фидар. Рагондæр арæндоныл нымад у Дзæуджыхъæуы Кировы уынджы 2-æм арæндон. Йæ архайды тыххæй бæстондæр радзурдзæн Чехойты Фатимæ.
Ам цардмæ фæзыны ног адæймаг. Дзæуджыхъæуы дыккæгæм арæндоны кусджытæй алчидæр ссардта йæхи йæ равзæрст дæсныйады. Алы специалист дæр зæрдæрайгæ у йæ профессионалон фæндагæй. Алтуника Пелопосян кæд ам 36 азы кусы, уæддæр алы хатт дæр йæ зæрдæ фехсайы. Йæ арæхстдзинадæй бирæ аразгæ у дыууæ уды – мады æмæ сывæллоны æнæниздзинад бахъахъхъæнын.
Кировы уынджы арæндоны истори райдыдты ивгъуыд æнусы 30-æм азты. Ам куыстой æмæ цардысты инженертæ. Уæд ничи æнхъæл уыд, 45-æм азы Уæлахизы боны размæ ам арæндон æрбынат кæндзæн, уый. Бæстыхай рацæрæзтой медицинон домæнтæм гæсгæ. Ныр дзы 2 дзæбæхгæнæн корпусы кусы 3 хайады. Арæндоны ма кусы Цæгат Ирыстоны медицинон академийы акушерон æмæ гинекологон кафедрæ. Æмгуыстады тыххæй бадзырд æххæстгонд цæуы медицинон колледжимæ дæр. Ацы медицинон ахуыргæнæндæтты рауагъдонтæ кусынц бæстæйы раззагдæр профилон куыстуæтты. Уыцы специалисттæй иу у арæндоны сæйраг дохтыр Тогойты Жаннæ.
Хорз зылд æмæ хъæрмуд ахастдзинад. Ам æнхъæлцау сылгоймæгтæм æмæ ноггуырд сывæллæттæм ис лæмбынæг цæстдард. Арæндон æххæст у ноггуырдты низтæ дзæбæх кæнынæн хъæугæ фæрæзтæй. Алы бон дæр дзы царды рухс фенынц 5 сывæллонмæ хæстæг. Уыдоны мадæлтæ æрмæст нæ республикæйæ не сты, цæгатирыстойнаг акушерты дæсныйадæн аргъ кæнынц сыхаг регионты цæрджытæ дæр.
