Транспорт самал кодтой, æнæниздзинадхъахъхъæнынады рацарæзты республикон программæ æххæст кæнгæйæ
13 ног санитарон машинæйы райстой республикæйы медицинон куыстуæттæ. Транспорт самал кодтой, æнæниздзинадхъахъхъæнынады рацарæзты республикон программæ æххæст кæнгæйæ. Кæцы рынчындæттæ райстой машинæтæ, æмæ ног транспорты фæрцы куыд аивдзæн сæ куысты фæтк, уый тыххæй радзурдзæн Фидараты Маринæ.
Æнæниздзинадхъахъхъæнынады рацарæзты республикон программæ æххæст кæнгæйæ, ног автотранспортон фæрæзтæ райстой Дзæуджыхъæуы фыццæгæм поликлиникæ æмæ Æрыдоны, Горæтгæрон, Рахизфарсы æмæ Мæздæджы районты рынчындæтты поликлиникæтæ. Æнæниздзинадхъахъхъæнынады рæзт у Цæгат Ирыстоны сæйрагдæр нысантæй иу, загъта премьер-министр.
Джызæлы амбулаторийæн 10 азы чи фæлæггад кодта, уыцы машинæ раивта ног «Нива». Шофыр Гуæцæлты Рамазан куыд зæгъы, афтæмæй зæронд УАЗ арæх домы цалцæггæнæн куыстытæ.
Рынчынтæм цæуыны рæстæг цас къаддæр уа, уыйас хуыздæр. Ацы фарста алыг кæнынæн ног траснпорт у хорз фæрæз. Фыццаджыдæр — пациенты æнæниздзинадыл куыст фæрæвздæр уыдзæн, дыккаджы та — дохтыртæ фылдæр адæмæн балæггад кæндзысты. Раздæр сæ-иу рынчынтæм хъуыди сæхи гъдауæй цæуын.
Ног санитарон машинæ уый у фыццаг хорз ивддзинад Джызæлы амбулаторийы. Дарддæр дзы хъавынц хъармгæнæн системæ баивын, электрон тыхдæттæг телтæ рацаразын æмæ объект медицинон кусæнгæрзтæй сифтонг кæнын. Майы та амбулаторийы фæнд кæнынц бындурон цалцæггæнæн куыстытæ райдайын.
Црау, Мæцъутæ, Къостайыхъæу æмæ Хуымæллæг. Ацы æмæ æндæр хъæуты хъуамæ райдайой амбулаториты æмæ фельдшерон-акушерон пунктты аразын. Уымæй дарддæр фæхуыздæр кæндзысты материалон-техникон бындур. Æдæппæтæй программæ царды рауадзынæн радих кодтой 370 милуан сомæй фылдæр.
