Скъолатæ ныридæгæн райдыдтой исын ног кусæнгæрзтæ
13 «Точка роста»-йы æмæ 2 ног «Кванториум»-ы байгом кæндзысты Цæгат Ирыстоны афæдзы кæронмæ. Скъолатæ ныридæгæн райдыдтой исын ног кусæнгæрзтæ: микроскоптæ, лабораторон æмбырдтæ, 3Д-принтертæ, робот-манипулятортæ æмæ æндæртæ. Ног фæзтæ аразыны фæрцы 1 мин 300 скъоладзауæн фæзындзæн, нырыккон ахуырадон фæрæзтæй пайда кæныны фадат. Уый тыххæй республикæйы сæргълæууæг Сергей Меняйло фехъусын кодта йæ телеграм каналы. Æдæппæтæй ныртæккæ Цæгат Ирыстоны кусы 125 «Точка роста»-йы æмæ 6 кванториумы. Уым сывæллæттæн сæ бон у робототехникæйæ архайын, мультфильмтæ ныв кæнын, скъолайы предметтæ арфдæр ахуыр кæнын. Республикæйы сæргълæууæг куыд загъта, афтæмæй нацпроект «Ахуырад»-мæ гæсгæ цы куыст цæуы, уымæн ис хорз бæрæггæнæнтæ. Скъолаты конкурсты æмæ конференциты уæлахиздзауты *хсæн физикæйæ æмæ математикæйæ фылдæр кæны, «Точка роста»-тæ кæм гом кæнынц, уыцы хъæутæй сывæллæтты нымæц. Фылдæр кæны, физикæ æмæ математикæйæ иумæйаг паддзахадон фæлварæнтæй бæрзонд баллтæ чи исы, уыцы рауагъдонты нымæц дæр.
