Ацы бонты йын радтой зындгонд Георгийы лент
136-æм артиллерион пъолкæн лæвæрд æрцыд кадджын ном «Гвардион». Ацы бонты йын радтой зындгонд Георгийы лент. Пъолк арæзт æрцыд 2022-æм азы сентябры, Уæрæсейы Президенты указмæ гæсгæ. Афтæмæй рахæцыдысты 58-æм æфсады мысанæхсæн дæлхайæдты фарс, стæй ма æххуыс кæнынц Сæрмагонд æфсæддон операцийы зонæйы хæстæ æххæст кæнынæн. Чехойты Фатимæ радзурдзæн бæстондæр хабæрттæ.
136-æм артиллерион пъолк арæзт кæй цæуы, уый æфсæддон Андрей Никель 2022 азы базыдта, æмæ йæхæдæг бацыд æфсæддон комиссарадмæ пъавесткæ райсынмæ. Ракетон рæнхъыты фæлтæрддзинад æм уыд. «Сыбыр»-æн – ахæм фæсномыг ис Андрейæн – йæ бон йæ хæдзары бадын нæ уыд. Уæд йæ сæйраг хъуыды уыд – йæ бинонты бахъахъхъæнын. 136-æм пъолк арæзт æрцыд Уæрæсейы президенты уынаффæмæ гæсгæ мобилизацигонд нæлгоймæгтæй æмæ бархионтæй Вологдайы, Костромайы, Ленинграды, Тамбовы æмæ Ярославы облæсттæй. Пъолк сси Хуссар æфсæддон зылды дæлбар, 58-æм æфсады хай.
136 артиллерион пъолк 2022 азы декабры райдыдта йæ *фсæддон хæстæ æххæст кæнын сæрмагонд æфсæддон операцийы зонæйы. Йæ фыццаг бонтæй пъолчы æфсæддонтæ равдыстой сæ хъайтардзинад æмæ дæсныйад хæсты быдырты. Дыууæ азмæ ныппырх кодтой знаджы 200 æфсæддон техникон фæрæзы. 2023-æм азы знаджы ныббырсты рæстæг Ореховы *рдыгæй пъолкæн йæ уæнгты иудзинады æмæ хъаруйы руаджы бантыст уæлахиз.
Сæрмагонд æфсæддон операцийы зонæйы артиллерион пъолкæн æфсæддонты иумæйаг хъайтардзинад, лæгдзинад æмæ хъæбатырдзинады тыххæй лæвæрд æрцыд кадджын ном – «Гвардион». Йæ уæнгтæ та систы паддзахадон хæрзиуджыты аккаг. Георгийы лент пъолкæн радта Хуссар æфсæддон зылды ракетон æмæ мысанæхсæн æфсады сæргълæууæджы хæдивæг Алексей Сухорученко. Уый раарфæ кодта хъæбатыртæн, загъта, цæмæй иууылдæр сæ хæдзæрттыл дзæбæхæй сæмбæлой.
Ныртæккæ гвардион артиллерион пъолчы æфсæддонтæ дарддæр æххæст кæнынц сæ хæстæ сæрмагонд æфсæддон операцийы зонæйы. Сæ хъæбатырдзинады руаджы хæстæгдæр кæнынц уæлахиз.
