филиал вгтрк государственная телерадиовещательная компания “Алания”

Уый кадæн абон Хуымæллæджы астæуккаг скъолайы арæзт æрцыд цымыдисаг фембæлд. Ацы хъæуæй рацыдысты Галазты Æхсарбег, Кокайты Саламджери, Дауыраты Дамир æмæ ма бирæ зындгонд адæм. Цæгат Ирыстоны нациты ахастдзинæдты фарстаты фæдыл министрады æмæ Хуымæллæджы скъолайы кусджытæ иумæйагæй сарæзтой ирон бæрæгбон. Семæ иумæ бацин кæнынмæ æмæ ирон æвзаджы аивдзинад æмæ уæздандзинадыл аныхас кæнынмæ сæм æрбацыдысты районы разамынды минæвæрттæ, «Стыр ныхас»-ы уæнгтæ, республикæйы æхсæнадон архайджытæ, зындгонд зарæггæнджытæ… Се ппæтæн дæр æхсызгон уыд, æмбырды кæй схорзæхджын кодтой республикон конкурс «Ирон аив дзырды дæсны»-ты уæлахиздзауты æмæ сæ ахуыргæнджыты. Фæлæ сæйрагдæр уый уыд, æмæ фæсивæд зæрдиагæй æмæ разæнгардæй кæй бацæттæ кодтой сæхи ацы бæрæгбонмæ. Уымæй дæр бæрæг уыд сæ уарзондзинад мадæлон æвзагмæ. Сæхæдæг куыд зæгъынц, афтæмæй æвзаг æмæ адæмы культурæ кæрæдзиимæ фидар баст сты. Нæй сæ адих кæнæн. Æмæ араздзысты алцыдæр, цæмæй рох макæмæй уа. Уыцы хъуыддаджы та æдзух сæ фарсмæ уыдзысты сæ хистæртæ æмæ нациты ахастдзинæдты фарстаты министрды кусджытæ.