Ацы куыст цæуы национ проект «Æнæпилотон авиацион системæтæ» царды уадзгæйæ
Аппаратон æмбырды ма куыд фехъусын кодтой, афтæмæй республикæйы 18 скъолайы æмæ иу колледжы ног къуырийы байгом уыдзысты æнæпилотон тæхæг аппараттæ кæм ахуыр кæндзысты, ахæм кълæстæ. Вице-премьер Платы Альбинæйы ныхæстæм гæсгæ, ахуыргæнæндæттæ ныридæгæн ифтонг сты хъæугæ техникон фæрæзтæй. Скъоладзауты ахуыр кæндзысты æнæпилотон авиацион системæтимæ кусын. Уыдонæн фидæны сæ зонындзинæдтæй сæ бон спайда кæнын уыдзæн арæзтады, хъæууонхæдзарады, геодезийы, картографийы, видеоисыны æмæ бирæ æндæр къабæзты. Ацы куыст цæуы национ проект «Æнæпилотон авиацион системæтæ» царды уадзгæйæ. Бæстондæр не мкусæг Чехойты Фатимæйы æрмæджы.
Имир Бугринæн робототехникæ уарзон сси, 8 азы йыл куы цыд, уæд. Цымыдисаг дунеимæ йæ базонгæ кодта йæ фыд. Ацы сæрды та йæ зæрдæмæ фæндаг ссардта ног зонад – программировани, бæлвырддæр зæгъгæйæ та – æнæпилотон тæхæг аппараттæ. Æртæ мæймæ сын Имир базыдта сæ сусæгдзинæдтæ.
Егор Лушпæйæн йæ зæрдæмæ тынгдæр цæуы дронтæ æмбырд кæнын. Йæ ныхæстæм гæсгæ, хи къухтæй арæзт æнæпилотон тæхæг аппарат уæлдæфмæ суадзын у уæлдай æхсызгон. Алыхуызон хæдтæхджытæм уарзондзинад раджы фæзынд йæ зæрдæйы. Ныр дыууæ азы дæргъы лæмбынæг ахуыр кæны сæ миниуджытæ æмæ хицæндзинæдтæ.
Нырыккон дуджы дронтæ æмæ квадрокоптертæ систы адæймаджы æрвылбон царды хъæугæ дзауматæ. Уæрæсейы 30 регионы сæрмагонд федералон проектмæ гæсгæ цæттæ кæнынц кусджытæ æнæпилотон авиацион системæтæн. Уыдоны *хсæн ис Цæгат Ирыстон дæр. Ныр дронты сусæгдзинæдтæ ахуыр кæндзысты республикæйы 18 скъолайы.
Проект æххæст кæнынæн радих кодтой 298 милуан сомы. Уыцы æхцайæ балхæдтой квадрокоптертæ, æмæ бирæ æндæр нырыккон техникон фæрæзтæ. Цæгат Ирыстоны проекты сæйраг фæзæн æвзæрст æрцыд Æрыдоны аграрон-технологон колледж. Æнæхъæн республикæйæ проектмæ гæсгæ зонындзинæдтæ райсдзысты 950 адæймаджы.
19 ахуыргæнæндоны фæдзындзысты ног ахуыргæнджытæ. Сæ зонындзинæдтæ уæрæхдæр кæнынмæ æрвыст æрцæудзысты 38 адæймаджы. Проект саразджытæ специалисттæн бацæттæ кодтой методикон æрмæджытæ æмæ сæрмагонд программæтæ.
Проект æххæстгонд цæудзæн 2030 азмæ. Цыколайы 3-æм скъолайы иннæ ахуыргæнæндæттæй раздæр фæзындзæн, æнæпилотон тæхæг аппараттæ чи ахуыр кæндзæн, ахæм кълас. Байгом æй кæндзысты кадджын уавæры 14 сентябры.
